आरसीबीचो प्ले ऑफांत रॉयल प्रवेश

भांगरभूंय | प्रतिनिधी

सामकें उमळशीक वाडोवपी मॅचींत रॉयल चॅलेंजर्स बंगळुरून सध्याचो वस्ताद चेन्नय सुपरकिंग्साक 27 धांवड्यांनी हारोवन प्ले ऑफांतली आपली सुवात निश्चीत केली.

बंगळुरून दिल्ले 219 धांवड्यांचे मोखीचो फाटलाव करपी चेन्नय सुपरकिंग्सान निर्धारीत 20 ओव्हरींनी 7 विकेटी व्हगडावन 191 धांवड्यो केल्यो. चेन्नयक प्ले ऑफाक पात्र जावपाक 20 ओव्हरींनी 201 धांवड्यो करपाची गरज आशिल्ली. पूण, ताका 10 धांवड्यो उण्यो पडल्यो.

दोनूय पंगडांचे दरेकी 14 गूण आसात, पूण बरे रन रेटीच्या नेटार बंगळुरून निमाण्या चारांत सुवात मेळयली. रचीन रवींद्र धांवबाद जावप चेन्नय खातीर टर्नींग पॉयण्ट थारलो. तशेंच फाफ ड्युप्लेसीसान कांय उत्कृश्ट कॅची धरून मॅचीचो निकाल निश्चीत केलो.

ते पयलीं रॉयल चॅलेंजर्स बंगळुरूक बरे सुरवाती उपरांत चेन्नय सुपरकिंग्साच्या स्पिनरांनी मदल्या ओव्हरींनी बांदून आडावन धरिल्लो. मिचेल सॅण्टनर आनी महिशा तीक्षणा हांणी उत्कृश्ट बॉलींग घाली आनी बंगळुरूची धांवड्यांची गती उणी केली. पूण, अखेरच्या ओव्हरींनी रजत पाटीदार आनी कॅमेरीन ग्रीन हांणी आक्रमक बॅटींग करून बंगळुरुचो स्कोर दोनश्याच्या मुखार पावयलो.

विराट कोहली आनी मुखेली फाफ ड्युप्लेसी हाणें बंगळुरूक आक्रमक सुरवात करून दितना 9.4 ओव्हरींनी 78 धांवड्यो केल्यो. स्पिनरांनी तांकां बांदून दवरिल्ल्यान धांवगती वाडोवपाक लागून दोगांयनी व्हड शॉर्ट खेळपाक सुरवात केली आनी हाचो फायदो चेन्नयक जालो. व्हड शॉर्ट खेळपाच्या यत्नांत कोहली बाद जालो. मिचेल सॅण्टनरान ताची विकेट घेतली. कोहलीन 29 बॉलांनी 47 धांवड्यो केल्यो. 13वे ओव्हरीचे अखेरच्या बॉलाचेर फाफ ड्युप्लेसीस धांवबाद जालो. सॅण्टनराचो बॉल रजत पाटीदारान सरळ मारलो, त्या वेळार फाफ ड्युप्लेसीस क्रीज सोडून मुखार गेल्लो. बॉल सॅण्टनराच्या बोटाक लागून विकेटींक आपटलो. बेल्स पडल्या उपरांत ड्युप्लेसीसाचें बॅट क्रिजींत पाविल्लें ताका लागून तिसऱ्या अंपायरान ताका बाद दिलो.

ड्युप्लेसीसान 39 बॉलांनी तीन चवके आनी तीन सक्यांचे मजतीन 54 धांवड्यो केल्यो. बंगळुरूक 113चेर दुसरो धपको बसलो. सॅण्टनरान चार ओव्हरींनी 23 धांवड्यो दिवन एक विकेट घेतली. महिशा तीक्षणान लेगीत चार ओव्हरींनी 25 धांवड्यो दिल्यो.

पाटीदार आनी ग्रीन हांणी बरी बॅटींग केली. ग्रीनाची सोंपी कॅच डॅरिल मिचेलान सोडली. पाटीदार आनी ग्रीन हे जोडयेन 22 बॉलांनी पन्नास धांवड्यांची भागिदारी केली. पाटीदार 23 बॉलांनी दोन चवके आनी चार सक्यांचे मजतीन 41 धांवड्यो करून कॅच बाद जालो आनी अशे तरेन ग्रीना वांगडी 28 बॉलांनी 71 धांवड्यांची भागिदारी तुटली. मिचेलान शिमे लागसार आनीक एक उत्कृश्ट कॅच धरली. दिनेश कार्तिकान सदचे भशेन आक्रमक बॅटींग केली. ताणें स बॉलांनी 14 धांवड्यो केल्यो. तुषार देशपांडेन चार ओव्हरींनी 49 धांवड्यो करून 1 विकेट घेतली.

ग्लॅन मॅक्सवॅलान पांच बॉलांनी 16 धांवड्यो केल्यो. कॅमेरून ग्रीनान 17 बॉलांनी तीन चवके आनी तीन सक्यांचे मजतीन नाबाद 38 धांवड्यो केल्यो आनी अशे तरेन बंगळुरून 5 विकेटी व्हगडावन 218 धांवड्यां मेरेन मजल मारली.