आरबीएस – एक चावडी

भांगरभूंय | प्रतिनिधी

चावडे वयल्यान येवपी- वचपी एकलीय व्यक्ती ताचे नदरेंतल्यान सुटना. ती झळकली काय तो मुखार उबे जाता आनी पायणींतल्यान गाडी घेवपाक लावून घोंटेरा कडेन वळयता.

काणकोणां चावडेर ‘घोंटेरां’त लिकलिकपी खडेगांठ वावुरपी आनी निश्ठावान कोंकणी सेवक म्हणल्यार रमेश कोमरपंत. ताच्या वावराची आनी सेवेची तोखणाय करपाक उत्तरां उणी पडटात. डॉक्टर सुश्रूत मार्टीन्स ट्रस्टाचे वतीन कोंकणीचो एक झुजारी आनी फुडारी सर्गेस्त सुश्रूताच्या नांवान दवरिल्लो हो स्मृती पुरस्कार. तो आरबीएसाक फावो जाल्ले खातीर मना- काळजांतल्यान खोस परगटायता आनी ताचे संबंदी स्फुरिल्लीं चार उत्तरां उक्तायतां. म्हूर्त ल्हान पूण कार्य म्हान, अशें ह्या वेळार म्हणन दिसता. त्या कार्याची ही एक पावती अशें हांव समजन.
रमेश कोमरपंताचें अभिनंदन. काणकोणांत भितर सरतनाच पयलो स्टॉप चावडेर. रमेश रावता चावडेर. चार- पांच जाण एकठांय जावन गजाली वा खबरी मारपाक लागले काय चावडी जमली वा भरली अशें म्हणप जातालें. पूण रमेश एकलोच चावडेचो प्रतिनिधी जावन वावुरताना आमकां दिसता. कित्याक तर रमेशा भोंवतणी सदांच लोकांची गर्दी. तो एकलो आसचना. थंयच्यान पासार जालो दरेकलो ताका हडकिले बगर वचना, इतली ताची लोकप्रियता. दिसपाक अत्यंत किरकोळ आनी सादारण अशें ताचें व्यक्तिमत्व, पूर्ण तेचबरोबर अत्यंत तोलामोलाच्या उदरगतीत, वावरांत भोव लक्षणीय भर घालपी मनशाक हो पुरस्कार फावो जाता ही अत्यंत सुखदिणी गजाल. कोंकणी खातीर जिवार उदार जावन झुजपी, झगडपी आनी केद्याय मोठ्या वावराचो पत्कर, जांव मागीर ती संमेलना वा परिशदो, जायते लोक आमचेमदीं आसात, तातूंतलो एक रमेश- कोकणी मोगी, कोंकणी भक्त – रमेशाक 30 डिसेंबराक भेटयतात तो डॉक्टर सुश्रूट मेमोरियल ट्रस्टाचो पयलो पुरस्कार हो आपणाकूच मेळ्ळा अशें दिखूंक जाय इललो ताचे विशींचो मोग आनी ताचे कडले आमचें आपलेंपण. ताणें कोंकणीक अर्पित केल्या कार्याचो आमकां अभिमान.
‘रमेश चावडेर बँकेत नोकरेक आसतालो. आतां रीटायर्ड. थंयच ताचें घर ‘घोंटेर’. नांवांत लेगीत तागेलें खाशेलेपण. घोंटेरांत जसो चिमण्यांचो चिवचिवाट तसो आपल्या घरांत कोंकणीच्या लोकांचो खोदोळ आसचो, बोवाळ आसचो. कोंकणी मोग्यांनी, बरोवप्यांनी येवचें, रावचें अशें ताचें मत आनी देखून ताचें घर ‘घोंटेर’ जालें.
चावडे वयल्यान येवपी- वचपी एकलीय व्यक्ती ताचे नदरेंतल्यान सुटना. ती झळकली काय तो मुखार उबे जाता आनी पायणींतल्यान गाडी घेवपाक लावून घोंटेरा कडेन वळयता.
रमेशाच्या कुटूंबा कडेन आमचो कितल्याशाच वर्सा सावन दाट संबंद. काणकोणा गेल्यार आमचें रावपाचे ठीकाण आरबीएसा कडेन. ताका लागून ताच्या कुटूंबा कडेन चड माया . रमेशाचे कुटूंब व्हडलें. ताचो व्यक्तिगत घराबो- बायल, भुरगी, भाव, भयणी, ह्या अपुरबायेच्या कुटुंबाभायर कोंकणीचो समाज ताच्या कुटुंबांत आस्पावता. रमेशाच्या संवसाराची घडी वेवस्थित सांबाळपाक ताची घरकान्न मेघन एकदम मायेस्त आनी लक्तुबायेची आशिल्ली. पूर्ण हातींच ती अंतरली. ताचें दुख्ख रमेशा बरोबर आमकांय खंती करता. घरांत आमचे सारकी कोणय भितर सरुं, हांसत्या तोंडान ताका ऊठ बस करपाक आनी सुरबूस जेवण रांदून वाडपाक ती तत्पर आशिल्ली. आयच्या खिणाक रमेशाचें अभिनंदन करतना तिचो विसर पडूंक शकना.
रमेशाच्या घरांत शिक्षणीक, समाजिक तशेंच साहित्यिक वातावरणाचो परमळ. ताका तीन चलयो. आपल्या तिगांय धुवांक मायेभोगान वाडयतना तांकां हुशार केल्यांत. तांचें शिक्षण आनी लाड करपांत मातय उणे पडपाक दिवूंना. संस्कार तर सामके पेजाद. दारांत आयिल्या परक्याक लेगीत दिसचें खंयच्याय हॉटेलांत रावचे परस आरबीएसाच्या घोंटेरांत रावचें, इतले ओडलायणे! व्हडले चली पुर्वा लंडनात पावलें आनी शिक्षिकेचे नोकरेक रुजू जालें. दुसरे रुबीया. लाणे लायब्ररीचें शिकप घेवन तें लायब्ररी असिस्टंट म्हूण नोकरेक, तिसरें प्राची. ते सरकारी शाळेंत चलयांक शिक्षित आनी स्वातंत्र्यान जगपाक तयार करपी रमेश सामको आधुनिक विचारांचो! ह्या सगळ्या गुणांचो मेळ जावन तयार जाल्लो आरबीएस एक सद्गुणी मनीस म्हणप योग्य थरतलें.
आयज मेरेन कोंकणीक जें जें मेळ्ळां तें झुजले बगर आनी झगडले बगर मेळूंक ना. तें मेळोवपाक ल्हानातले ल्हान आनी म्हानांतलेय ल्हान जावन वांटेकार जाल्यात. एकदां कोंकणी कडेन आयिल्लो मनीस केन्नाच पयस वचूंक ना. रमेश हो असो निगरगट्ट आनी चिकाटी आशिल्लो मनीस. तो कोंकणी खातीर झुजला, हेरां कडेन वाद घाला, तो रागार फुगारय जाला. पूण सगलें कोंकणी खातीर! आनी म्हणूनच तर म्हणीन दिसला, फाटलीं कितलीसींच वर्सा कोंकणीचे उदरगतीत वावरांत समर्पित जाल्ल्या सेवाभावी वृत्तीच्या व्यक्तीचे गूण वळवून तांची किंमत करपी रत्नपारखी लोक आमचे मदीं आसात, ताची काळजांतल्यान खोस भोगता.

हेमा नायक
8956410326