भांगरभूंय | प्रतिनिधी
मुंबय, खबरां संस्था ः भारतीय रिझर्व्ह बँकेन हालींच केवायसी म्हळ्यार ‘नो युवर कस्टमरा’ खातीर नवो नेम सुरू केला. जांतूत कांय बदल केल्यात. अर्थीक वेव्हारांत भानगडी जावचो न्हय हे खातीर नेमांत बदल केल्यात. ह्या नव्या बदलांक लागून गिरायकांची वळखप करप सोंपें जातलें.
केवायसी म्हणल्यार कितें?
केवायसी म्हणल्यार नो युवर कस्टमर. तातूंत तुमचें नांव, वळख, घरचो पत्तो सारकिल्ले सगळे तपशील आसतात. बँक खातें उगडपा खातीर केवायसी गरजेचें आसता. मनी लाँड्रिंग, टेरर फंडिंग आडावपा खातीर केवायसी संबंदी कांय मार्गदर्शक तत्वां चालीक लायल्यात. नेमाच्या बदलां प्रमाण गिरायकाक आतां सद्याच्या फोटो वांगडा घराच्या पत्त्याचो पुरावो दिवचो पडटलो. ह्या पुराव्यां मदीं वाहन चालक परवानो, पासपोर्ट, मतदार आयडी कार्ड, पॅन कार्ड आदी आस्पावीत आसा. हाची प्रत बँकेक दिवची पडटली.
डिजिटल केवायसी म्हणल्यार कितें?
डिजिटल केवायसी ही बँकांनी दिवपी सेवा. हांतूत गिरायक बँके कडेन ऑनलायन संपर्क करुन आपलो लायव्ह फोटो दिवंक शकतात. तशेंच हाचे वरवीं आधार कार्ड सारकिल्ले कागदपत्रूय सादर करूं येता. तुमी ज्या इमारतींत रावतात ताचो फोटोय अपलोड करूं येता. हें अपडेट केल्यार तुमचें खातें आनीक सुरक्षीत दवरपाक मजत करता.
केवायसी नेमांत खंयचे म्हत्वाचे बदल केल्यात?
० बँको वा वित्तीय संस्था आतां खातें उगडपाच्या वेळार केवायसी पुराय करतात.
० ज्या खात्या विशीं चड धोको दिसता ताचेर खासा नदर दवरतात.
० कांय काळा उपरांत केवायसी अपडेट करपाचो पर्यायय उपलब्ध आसा.
नव्या नेमा प्रमाण वित्तीय संस्थांनी अपडेट केवायसी म्हायती केंद्रीय केवायसी नोंदणी कडेन दिवप गरजेचें आसा. बँकांनी, वित्तीय संस्थांनी अपडेट केवायसी मेळ्ळ्या उपरांत सात दिसां भितर केंद्रीय केवायसी नोंदणी कडेन ती दिवप गरजेचें. वित्तीय संस्था केवायसी आयडेंटिफायर वापरून गिरायकाचो केवायसी परत मेळोवंक शकतात. देखून तीच कागदपत्रां परतून सादर करपाची गरज ना.
केवायसी नेमांत हे बदल केवायसी प्रक्रिया सोपी करपा खातीर केल्यात. हाका लागून संस्थानी सुरक्षीत डेटा तयार जाता. तशेंच अर्थीक भामगडींचेर आळाबंदा हाडपाक हाची व्हड मजत जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
