भांगरभूंय | प्रतिनिधी
नवी दिल्ली, खबरां संस्था ः रिझर्व्ह बँकेन क्रेडीट कार्डाचें बिल फारीक करपा संबंदी नवो नेम जारी केला. ह्या नेमा प्रमाण क्रेडीट कार्डांचे बिल आरबीआयचे बील पेमेन्ट सिस्टिम (बीबीपीएस) पद्दतींतल्यान फारीक करचें पडटले. देखून ह्या नव्या नेमाचो परिणाम फोन पे, क्रेड, बीलडेस्क, इन्फिबिन ह्या फिनटेक कंपनींचेर पडपाची शक्यताय आसा. हो नवो नेम 1 जुलय सावन लागू जातलो.
मेळिल्ले म्हायती प्रमाण एक्सिस बँक, एचडीएफसी बँक, आयसीआयसीआय बँकेन आजून बीबीपीएस प्रणाली सक्रिय करूंक ना. ह्या बँकांनी आतां मेरेन आपल्या गिरायकांक पांच कोटी परस चड क्रेडीट कार्डां दिल्यांत. देखून फोन पे, क्रेडीट आनी हेर अॅपा वरवीं ह्या बँकांचे क्रेडीट कार्ड बिलां फारीक करपाक अडचणी येवंक शकतात. जो मेरेन ह्यो बँको बीबीपीएस प्रणाली सक्रिय करिनात तो मेरेन वयर सांगिल्ल्या ॲप्स वरवीं क्रेडीट कार्डाचीं बिलां फारीक करपाक मेळचीं नात.
मजगतीं, हो नेम शिथील करून बीबीपीएस पद्दत सुरू करपाक आनीक 90 दिसांचो वेळ दिवचो अशी मागणी केल्या. वट्ट 34 बँकांक क्रेडीट कार्ड दिवपाची परवानगी आसा. पूण आतां मेरेन हांतूतल्या फकत 8 बँकांनी बीबीपीएस प्रणाली सक्रिय केल्या. बीबीपीएस प्रणाली सक्रिय आशिल्ल्या बँकांनी एसबीआय कार्ड, बीओबी कार्ड, इंडसइंड बँक, फेडरल बँक, कोटक बँक, महिंद्रा बँक हांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
