भांगरभूंय | प्रतिनिधी
मुंबय, खबरां संस्था: मुंबय सारक्या सपनांच्या शारांत कोण रोजगारा खातीर, कोण चित्रपटांत काम करपाक जाल्यार कांय जाणा हेर गजालींक भुलून येतूच आसतात. आवय-बापाय कडेन झगडीं जाल्ल्यान कांय ल्हान भुरगीं घर सोडून देशाचे हे अर्थीक राजधानींत दाखल जायत आसतात. हातुंतल्या कांय भुरग्यांक कोणूय फटोवन मुंबय, कोलकाता, बंगळुरू, नाशिक, पुण्या सारक्या शारांनी हाडटात. मेजकींच भुरगीं हे ‘मोह नगरींत’ आपलें भुरगेंपण शेणोवन बसतात. कांय जाणांक अपंग करून भीक मागपाक लेगीत बसयतात. तर कांय जाणांक शिंदळकी वेवसाय चलपी जाग्यांचेर विकतात. असल्या घर सोडून आयिल्ल्या चले- चलयांक तांच्या पालकांच्या घरा धाडपाचें काम आरपीएफ म्हळ्यार रेल्वे सुरक्षा बळ सदांच करीत आसता. हे मोहिमेक ‘नन्हे फरिश्ते’ अशें नांवूय दिलां. हे मोहिमे खाला फाटल्या सात वर्सांनी घर सोडून आयिल्ल्या वट्ट ८४,११९ भरग्यांची सुटका करून तांकां तांच्या पालकांचे सुवादीन केलां.
भारतीय रेल्वेच्या देशातल्या राज्यांक एकामेकांक जोडटात. मात हे रेल्वेंतल्यान जायते फावट आपल्या सपनांचो फाटलाव करून भुरगीं पालकांक कांयच कळनासतना मुंबय सदांच दाखल जातात. ह्या असल्या भुरग्यांक वेळार वळखून तांकां मजत करपाचें काम चायल्ड हेल्पलाय ही संस्था करीत आसता. हे संस्थेच्या स्वयंसेवकांची मजत घेवन रेल्वेच्या सुरक्षा बळाच्यो बायलो पुलिसूय हे मोहिमेंत वांटो घेतात. रेल्वे सुरक्षा दळ (आरपीएफ) फाटलीं सात वर्सां ‘नन्हे फरिश्ते’ मोहीम प्रभावी पणान राबयता.
हे मोहिमेंत फाटलीं सात वर्सां ( २०१८- मे २०२४ ) विवीध रेल्वे स्टेशनां आनी रेल्वेच्या ट्रेनींत संकश्टांत सांपडिल्ल्या वट्ट ८४,११९ भुरग्यांची सुटका केल्या. हातूंत ३,४३० चले घरांतल्यान पळून आयिल्लें. हातूंत चलयांचो आंकडो १,१६१ इतको आशिल्लो. २०१८ वर्स हे मोहीमे खातीर सामकें म्हत्वाचें थारलें. ह्या वर्सा आरपीएफान वट्ट १७,११२ चले आनी चलयांची सुटका केली. २०१८ वर्सा रेल्वेक असल्या उपक्रमांची कितली गरज आसा हें समजलें. वर्स २०१९त १५,९३२ चले- चलयांची सुटका केली.
कोरोना काळांत आव्हानां
कोवीड म्हामारीक लागून २०२० हें वर्स सगळ्यांच खातीर आव्हानांचें थारलें. ह्या दुयेंसाचो परिणाम रेल्वे मोहीमेच्या कामाचेरूय जाल्लो. तरी ह्या काळांत आयिल्ल्या आव्हानांक तोंड दिवन आरपीएफान अंदूं ५,०११ भुरग्यांची सुटका केली. वर्स २०२१त आरपीएफान ११,९०७ भुरग्यांची सुटका करून तांचें काव्नसिलींग करून तांकां तांच्या पालकां कडेन पावयलें.
वर्स २०२२ त, आरपीएफान परत १७,७५६ भुरग्यांची सुटका करून तांकां मनीस तस्करी, घुंवळे वखदांचें रॅकेट ह्या धोक्यांतल्यान सुटका केली. हो आतां मेरेनचो सगळ्यांत व्हड आंकडो जावन आसा.
२०२३ वर्सा आरपीएफान ११,७९४ भुरग्यांची सुटका केली. अंदूं २०२४ मे महिन्यां मेरेनच्या पयल्या पांच म्हयन्यांत आरपीएफान ४,६०७ भुरग्यांची सुटका केली. हातूंत घरांतल्यान पळून आयिल्ल्या ३४३० जाल्या शेणिल्ल्या ३८६ भुरग्यांचो आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
