भांगरभूंय | प्रतिनिधी
भांगरभूंय । प्रतिनिधी
पोरणे गोंयः आपल्या गाळ्यो संवून जितो मारपाची धमकी दिल्ले खातीर रिव्होल्युशनरी गोवन्साचो (आरजी) म्हणयारो अजय खोलकार हाणे चिंबल पंचायतीच्या पंच्या आड पोरणे गोंय पुलीस स्टेशनांत कागाळ केल्या. एका डिमोलिशन ऑर्डरची किदें जालां हाची चवकशी करपा खातीर पंचायत कार्यालयांत गेल्ले कडेन संबंदीत पंचान सरपंच आनी हेर पंचां सामकार आपल्याक जितो मारपाची धमकी दिली अशें खोलकारान कागाळेंत नमूद केलां.
चिंबल पंचायत वाठारांत चलिल्ल्या गैर प्रकारां आड अजय खोलकार आवाज काडटा देखून चिंबलच्या स्थलांतरीतांनी वेंचून दिल्ल्याा ह्या पंचान खोलकार हाका मारपेट करपाची तशेंच जितो मारपाची धमकी दिल्या. ताचे आड खर कारवाय करपाची मागणी आमी मुख्यमंत्री डॉ प्रमोद सावंत हांचे कडेन करतात अशें सान्तआंद्रेचो आमदार विरेश बोरकारान सांगलें.
संबंदीत पंचान गोंयकारांक हात लायल्यार आमी ओगी रावचे नात. स्थलांतरीतांच्या मतांनी पंच, सरपंच जाल्ल्यान आपले राजकी संबंद वापरून आमी कितेंय करपाक शकतात असो समज सध्या जाल्ले कडेन आसा. धमकी दिल्या म्हणून आरजीच्या वावुरपी ओगी रावचे नात. जंय अन्याय, गैरवेव्हार चल्ल्यात ताचे आड आमी आवाज काडटले अशें आरजीचो मुखेली मनोज परबान सांगलें.
मजगतीं, अजय खोलकार, विरेश बोरकार आनी मनोज परब हाणे बिरेस्तारा पुलीस म्हासंचालक जसपाल सिंग हांका निवेदन सादर करून तांका एससी, एसटी अत्याचार प्रतिबंदक कायद्या खाला पंच वांगड्याचेर कारवाय करपाची मागणी तांचे कडेन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
