भांगरभूंय | प्रतिनिधी
आपचे गोंय संयोजक अमित पालेकार हांचो आरजीचेर फार
पणजीः रेव्होल्युशनरी गोवन्स पक्ष (आरजीपी) ही भाजपाची बी टीम म्हूण सिद्ध जालां. देखून आरजीपीचे वावुरपी तांची विचारसरणी सोडून आम आदमी पक्षाची विचारसरणी स्विकारपाक लागल्यात. जेन्ना आम आदमी गोंयच्या ज्वलंत मुद्यांचेर आवाज काडटाले तेन्ना आरजीपी दिसनासली, आरजीचे आदले उमेदवार श्रीकृष्ण परब हांकां पक्षांत येवकार दिले उपरांत आपाचे संयोजक अमित पालेकार हांणी आरजीक वडीर काडल्या. तीन दिसां पयलीं दिल्लींत अरविंद केजीरवाल हांणी दिवचल मतदारसंघताले आरजीपीचे आदले उमेदवार श्रीकृष्ण परब हांकां आम आदमी पक्षांत येवकार दिल्लो.
पणजे कार्यालयांत ताका परत येवकार दितना श्री. पालेकार हांणी सांगलें, नवी उमेद घेवन परब आपांत आयल्यात आनी तांची संघटन सचीव पदाचेर निवड जाल्या. पक्षांत येवचे पयलींच तांणी कामाक सुरवात केली. तशेंच लोकसभा वेचणुकेंत दक्षीण आनी उत्तर गोंयांत इडी आघाडी खातीरय तांणी काम केलां.
गोंय आनी गोंयकार ही विचारसरणी घेवन आरजीपीची स्थापना जाल्ली. पूण, फुडलो प्रवास करतना आरजीपीचे बसींतल्यान कोण कोण देंवले हें आरजीपीन सांगपाक जाय. आरजीपीन ३८ मतदारसंघांत विधानसभा वेंचणूक लढयली. जे लोक त्या वेळार तांचे वांगडा आशिल्ले ते आतां नात. श्रीकृष्ण हे आरजीपीचे संस्थापक वांगडी आसले. मात तांकां पक्षांतल्यान कित्याक काडले, हाचीं कारणां आरजीपीच्या अध्यक्षाक सांगपाक जाय. श्रीकृष्ण हांची भुमिका आनी ताची विचारसणी आरजी घडोवपाक कितली व्हड आसा तें सगळ्यांक खबर आसा, अशें पालेकार हांणी म्हणलें.
ज्या वेळार गोंयच्या विशयांचेर विरोधक आवाज काडटाले जशे, बेरोजगारी, जमीन रुपांतर, जमीन हडप तेन्ना आरजी गायब जाल्ली आनी त्याच वेळार आरजीचे लोक पयस गेले आनी आयज ते आम आदमी पक्षाचेर विस्वास दवरतात, अशें पालेकार हांणी सांगलें.
क्रुझ सिल्वा आपाचे हे एकसुरे आमदार जांणी गोंया खातीर प्रादेशिक आराखड्याची मागणी केल्या. उपरांत वेन्झी व्हिएगस आनी हेर फुडार्यांनी तांकां तेंको दिवन गोंयच्यो जमनी वाटावपा खातीर गोंयांक प्रादेशीक आराखडो दिवचो म्हण चळवळ लेगीत सुरू केल्ली. हे विचारसरणेचेर विस्वास दवरून जो कश्टकरी आनी तरणाटो फुडारी जांकां आपली राजकी आकांशा व्हड करपाची आसा तांकां पक्षांत येवकार आसा, अशें पालेकार हांणी म्हणलें.
परब हांचें मत
फाटलीं पांच- स वर्सां समाजकार्यांत सक्रीय जाले उपरांत राजकारणांत सक्रीयता दाखयली. आम आदमी पक्ष हे म्हाजी एक नवी वळख आनी नवी सुरवात, अशें श्रीकृष्ण परब हांणी सांगलें.
जी विचारसरणी घेवन हांव समाजीक आनी राजकी मळार सक्रीय जाल्लो तीच विचारसरणी घेवन फुडें वतलो. गोंय आनी गोंयकारांचे वेगवेगळे विशय आसात ते कशे फुडें व्हरप ताचेर सुटावो कसो करप, हें म्हजें काम आसतलें अशें सगळ्यांक आश्वासन दिता. जो फाटले वेळार मदीं एक विसव घेतलो आनी तेंच काम तीच विचारसरणी हांव राष्ट्रीय पक्षाच्या मळार हाडटलों, अशें परब हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
