भांगरभूंय | प्रतिनिधी
आरजीपीचे मुखेली मनोज परब हांची घोशणा
पणजीः रेव्ह्यूलेशनरी गोवन्स पक्षान युती करपा खातीर दारां उक्तीं दवरल्यांत, मात युती करतना आमी आमच्यो विचारधारा आनी धोरणाकडेन तडजोड करचे नात. आरजीपीन गोवा फॉरर्वडा वांगडा चर्चा चालू केल्या. तशेंच आपले मुद्दे कॉंग्रेस आनी आम आदमी फुड्यान दवरल्यात. आपलो अहंकार कुशीक दवरून गोंयकारां खातीर एकठांय येवपाक जाय, अशें आरजीपीचे अध्यक्ष मनोज परब हांणी सांगलें.
गोवा फोरर्वडा वांगडा केल्ल्या पेडणेंच्या आंदोलनांत आमी पुराय दीस टॅक्सीकारां वांगडा रावले. मुख्यमंत्र्याक मेळून तांचेर चेंपण घातले उपरांत हें आंदोलन येसाक आयलें, अशें परब हांणी सांगले.
राजकी आनी विचारसरणीचे मतभेद कुशीक
हांव आनी विजय सरदेसाय हे दोन बळ एकवटान टॅक्सिकारांचो विशय घेवन मुख्यमंत्र्याक मेळ्ळे. तेन्ना टॅक्सिकारांक वेगळो कावंटर दिवचो आनी ब्लू कॅब थळाव्या टॅक्सिकारां खातीर उक्ती करची अश्यो दोन मागण्यो पुराय जाल्यो. पेडणेंच्या टॅक्सिकारांच्यो मागण्यो पुराय जावप हें आमचे खातीर एक जैत आसा आनी फुडाराक कितेंय सकारात्मक गजाली जातल्यो अशी आमकां आस्त आसा, अशें परब हांणी म्हणलें.
हे घडामोडी उपरांत म्हज्या आनी विजया मदीं कसलीच चर्चा जावंक ना. पक्षाची उत्तर आनी दक्षीण गोंय केंद्रीय वेचणूक समिती आनी हेर फांट्यां कडेन उलयले उपरांतूच फुडलो निर्णय घेवप पक्षाचो अध्यक्ष म्हण म्हजें कर्तव्य जाता. हे बसकेंत आमी फुडें वचपा खातीर प्रस्ताव दवरतले. तातूंत कॉमन मिनिमन प्रोगामांत आमचे मुद्दे जशे, पोगो, जमीन संरक्षण विधेयक, म्हादय, बेकायदेशीर वोटींग कार्ड, बिगर गोंयकार हे आसतलेच. गोंयचो सगळ्यांत व्हडलो प्रादेशीक पक्ष आशिल्ल्यान ह्या मुद्यांचो विचार जातलोच, अशें परब हांणी म्हणलें.
भाजप आनी कॉंग्रेसी उपरांत राज्यांत सगळ्यात व्हडलो पक्ष हो आरजीपी आसा. आमी हो प्रस्ताव कॉंग्रेसी आनी आम आदमी पक्षा मुखार दवरतले. गोवा फॉरवर्ड कडेन उलोवप चालू जालां आनी फुडलीं अधिकृत पावलां केंद्रीय समितीचे बसके उपरांत थारतलीं. आमी युती खातीर दारां उक्तीं केल्यांत. मात गोंयचें हीत लक्षांत दवरून युती खातीर आमच्यो कांय अटी आसतल्यो, अशें परब हांणी जाहीर केलें.
विजया आनी म्हजे भितर हाचेय पयलीं आरोप-प्रत्यारोप जाल्यात. मात आमी अहंकार घेवन बसत जाल्यार गोंय खंयतरी भाजपाच्या हातानूच उरतलें आनी फुडलीं धा वर्सां कोणाकूच सरकार करपाक शक्य जावचें ना. अहंकार कुशीक दवरून आमकां गोंयकारांच्या हिता खातीर एकठांय येवपाक जाय. मात आमी खयसरूच आमची विचारधारा आनी धोरणां कडे तडजोड करपाचे नात, अशें परब हांणी स्पश्ट केलें.
शहा हांणी जाप दिवची
केंद्रीय गृह मंत्री अमित शहा गोंयांत ‘म्हजे घर’ येवजणेचें उक्तावण करपाक येवपाचे आसा. हे कार्यावळीच्या भाशणांत शहा हांणी म्हादय गोंयची काय कर्नाटकाची ते जाहीर करचें. म्हजे घर येवजणे खाला कितलीं गोंयकारांचीं, जाल्यार कितलीं भायल्यांचीं घरा कायदेशीर जातलीं हे विशींचो डेटो व्हडले स्क्रिनिचेर शहा हस्तुकी उजवाडाक हाडचो आनी चिंबला युनिटी मॉलाचें उक्तावण करचे पयलीं तोयार तळ्याक भेट दिवची, अशी मागणी मनोज परब हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
