आरजीपीचे 12 उमेदवार झेडपी वेंचणुकेच्या रिंगणात

भांगरभूंय | प्रतिनिधी

काँग्रेसीन जाहीर केल्ल्या उमेदवारांचे मतदारसंघ कुशीक दवरून घोशणा

भांगरभूंय । प्रतिनिधी
पणजीः रेव्ह्युलेशनरी गोवन्स पक्षान आपल्या जिल्हो पंचायत वेंचणुकेच्या उमेदवारांची पयली वळेरी जारी करून 12 उमेदवार जाहीर केल्यात. विरोधकांचे युती बाबत जावपी चर्चा आनी कोफुसांवा मजगतीं ही वळेरी जारी जाल्ल्यान राजकी चर्चेक ओतो आयलां.
आरजपीन बिरेस्तारा सकाळीं उमेदवारांची वळेरी जारी करून उत्तर गोंयांत सात आनी दक्षीण गोंयात पांच उमेदवार जाहीर केलें.
उत्तर गोंयच्या तोरशें मतदारसंघात नारायण शिरोडकार, कोलवाळे मतदारसंघात प्रज्ञा सावंत, सिरसय मतदारसंघात सिप्रीयान परेरा, शिवोले मतदारसंघात जयनाथ पाडोलकार, हणजूणा मतदारसंघात मिगेल क्वेरोझ, सांत क्रुझ मतदारसंघात एस्प्रेन्सा ब्रागांझा आनी सेंट लोरेन्स मतदारसंघात तृप्ती बकाल हांका पक्षाची उमेदवारी मेळ्ळ्या.
दक्षीण गोंयच्या वेलिंग-प्रियोळ मतदारसंघात निता जल्मी, बेतकी खांडोळा मतदारसंघात विनय गावडे, केवला मतदारसंघात विश्वेश नायक, बोरी मतदारसंघात हर्षा बोरकार आनी शिरोड्यां मतदारसंघात दिपीनीती शिरोडकार हांका पक्षाची उमेदवारी मेळ्ळ्या.

मजगतीं, काँग्रेस, आरजपी आनी गोवा फॉरर्वड हांचे मदीं युतीची चर्चा अजूनय चालू आसा. पूण फुडलो निर्णय अजून मेरेन कळूंक ना. ही चर्चा चालू आसतानाच काँग्रेसीन आपली पयली उमेदवारांची वळेरी जारी केली. हाचो धक्को आरजीपीक बसलो. आमच्या कडेन काँग्रेसीन विश्वासघात केल्ल्याचो आरोप करून आयज मेरेन युती विशींचो निर्णय कळयतले अशे जाहीर केल्ले. आयज आरजीपीन उमेदवारांची घोशणा करून एक वेगळे मोडण दिला.
पूण नोंद करपाची गजाल म्हळ्यार ज्या मतदारसंघानी काँग्रेसीन पयली उमेदवार जाहीर केल्ले ते मतदरासंघ आरजीपीन आपल्या पयलें वळेरेत कुशीक दवरल्यात. देखून युती बाबतची सकारात्मक बाजू अजूनय उक्ती आसा. पूण दुसरे वटेन गोवा फॉरर्वडान शिरोड्यां मतदारसंघात आपल्या उमेदवारांच्या प्रचाराका सुरवात केल्या आनी आरजीपीन गोवा फॉरर्वडाचे संभाव्य उमेदवार काजल गांवकार हांचे आड आपले उमेदवार उबो केला. फकत काँग्रेस आनी आरजीपीन उमेदवार जाहीर केल्यात. गोवा फॉरर्वड अजून आपले उमेदवार जाहीर करपाचे आसात.