आरक्षणा विशीं दाखल केल्ले याचिकेचेर अंतरीम थाकाय

भांगरभूंय | प्रतिनिधी

पणजी म्हानगरपालिका वेंचणूक

पणजी: पणजी म्हानगरपालिकेच्या प्रभाग एकच्या आरक्षणा विशीं दाखल केल्ले याचिकेचेर अंतरीम थाकाय दिवपाक मुंबय उच्च न्यायालयाच्या गोंय खंडपिठान न्हयकार दिलो. पूण वेंचणूक जाले उपरांत याचिकादाराक संबंदीत यंत्रणे कडेन दाद मागपाक मेकळीक दिल्या. याचिकादारान केल्ल्या राजकी दुस्मानकायेचो आरोप प्रकरणांत याचिकेंत दुरुस्ती करून संबंदीत व्यक्तीक प्रतिवादी करपाक मेकळीक दिल्या.

हे विशीं नेल्सन काब्राल हांणी याचिका दाखल केली. तातूंत तांणी राज्य सरकार, नगरपालिका प्रशासन, गोंय राज्य वेंचणूक आयोग, पणजी म्हानगरपालिका, तिसवाडी उपजिल्होधिकारी आनी तिसवाडी मामलेदार हांकां प्रतिवादी केल्यात.

गोंय राज्य वेंचणूक आयोगान पणजी म्हानगरपालिकेची वेंचणूक 11 मार्च दिसा जाहीर केल्या. तशेंच 13 मार्च दिसा मतमेजणी जाहीर केल्या. तेप्रमाण आयोगान 10 फेब्रुवारी दिसा पणजी म्हानगरपालिकेचे प्रभाग आरक्षण अधिसुचीत केली. याचिकादार प्रभाग एकांतलो सद्याचो नगरसेवक आसा. ताका त्या प्रभागांतल्यान वेंचणूक लडोवपा पसून वंचीत दवरपा खातीर राजकी मनशान ताचो प्रभाग एसटी बायलां खातीर राखीव दवरलो. तशेंच प्रभाग दोन मदले सुमार 440 परस चड एसटी मतदार प्रभाग एकांत घाल्ल्याचो आरोप याचिकेंत मांडला. तशेंच हे विशीं तांणी पयलींच शक्यताय उक्तावन संबंदितां कडेन पत्र वेव्हार केल्ल्याचो दावो करून न्यायालयांत युक्तिवाद मांडलो.

तशेंच मंगळारा नामांकन करपाची निमाणी तारीख आसा. ताका लागून याचिकादाराक त्या प्रभागांतल्यान नामांकन करपाची अंतरीम थाकाय दिवपाची मागणी केली.

ह्या प्रकरणाची न्यायालयांत सुनावणी जाली तेन्ना, राज्य सरकारा वतीन अ‍ॅडव्होकेट जनरल देविदास पांगम हांणी याचिकेक हरकत घेवन युक्तिवाद मांडलो. तातूंत तांणी 20 जानेवारी 2026 दिसा प्रभाग फेररचणूक प्रक्रिया केल्ली. त्या वेळार नागरिका कडल्यान हरकती मागिल्ल्यो. पूण त्या वेळार याचिकादारान कसलीच हरकत दाखल केल्ली ना.

2 फेब्रुवारी दिसा प्रभाग फेरचणुकांची अधिसुचोवणी जारी केल्ली. ताचे उपरांत 10 फेब्रुवारी दिसा प्रभाग आरक्षण अधिसुचीत केली. उपरांत राज्य वेंचणूक आयोगान पणजी म्हानगरपालिकेची वेंचणूक 11 मार्च दिसा जाहीर केली. तशेंच 13 मार्च दिसा मतमेजणी जाहीर केली.

याचिकादारान निमाण्या नामांकन करपाच्या निमाण्या दिसा याचिका दाखल केली. ताका लागून ही याचिका दाखल करपायोग्य ना तशेंच भायरावपाची गरज आशिल्ल्याचो दावो केलो.

वेंचणूक आयोगा वतीन अ‍ॅड. सोमनाथ कर्पे हांणी वयल्या मुद्याक दुजारो दिलो. ह्या प्रकरणांत न्यायालयान वयली मेकळीक दिवन अंतरीम थाकाय दिवपाक न्हयकार दिलो.