भांगरभूंय | प्रतिनिधी
घांटांत पसून आसचीं नात, इतलीं मोडणां, व्होल्तां आसगांवच्या प्रकरणान फाटल्या 2- 3 दिसांनी घेतल्यांत. ताका लागून सर्वसामान्य भौस गोंदळून गेला. हें प्रकरण नेमकें कितें तें ताका कळना जालां. तातूंत ही खबर अर्द खरी, ती चुकीची, ती दिशाभूल करपी अशें कानार पडपाक लागिल्ल्यान तो घुंवळेला. घरधनयान जमीन विकली, मागीर नव्या धनयान ब्रोकरा वरवीं तिचेर आशिल्लें घर खाली करपाक लायलें, तें करिना म्हूण बुलडोझर लावन मोडलें, बावन्सरांचो बोवाळ, पुलीस केश, बावन्सरांक अटक, मुख्य सचिवान चवकशी सुरू केली, पुलीस निलंबीत जाले, मोडिल्लें घर सरकारी खर्चान बांदून दिवपाचें आस्वासन मुख्यमंत्र्यान थंय वचून दिलें, तो खर्च घर मोडप्या कडल्यान वाशील करता अशेंय सांगलें, फुडाऱ्यांच्यो प्रतिक्रिया आयल्यो. मध्यानरातीं कळ्ळें घरांत रावप्यांनी केश फाटीं घेतल्या. घर बांदून दिवपाचें आनी नांवार करपाचें आस्वासन तें मोडप्यान दिलां, सकाळ फुडें खबर आयली डीजीपीन हणजूण पुलिसांचेर चेपण हाडून घर मोडपाक लायिल्लें, उपरांत गुन्यांव फांट्याच्या एसपीची पत्रकार परिशद, पुलिसाच्या व्हायरल जाल्ल्या पत्राचेर ताची सयूच ना, मदींच एक आमदार ह्या प्रकरणांत धुस्पल्ल्याचो आरोप, ताचो काय संबंद ना, अशें घरांत रावप्यांचें स्पश्टीकरण, विवीध पत्रकार परिशदो…..!! मोडणार मोडणां. जानवें सोडयतना तें घुस्पता, मागीर ते सोडयता म्हणसर अक्षरशा नाका पुरो जाता, तसलोच हो आसगांवचो प्रकार! आतां हो घुस्पागोंदळ बेगीन सुटचो, अशी आस सगलेच गोंयकार बाळगून आसतले.
काँग्रेसीचे आमदार अॅड. फेरेरा हांणी हाचे फाटल्यान वरिश्ठ आयपीएस अधिकारी आसात, असो गंभीर आरोप पयर केल्लो. पुलिसाच्या पत्रान तो अधिकारी कोण तें गोंयकारांक कळ्ळें. तातूंत घर मोडपाक दिना जाल्यार कडक कारवाय करपाची, घुंवळे वखदां प्रकरणांत आडकावपाची धमकी आपणाक डीजीपीन दिली, अशें म्हणलां. मात ताचेर ताची सय ना, अशें उपरांत पत्रकार परिशद घेवन एसपीन जाहीर केलें. म्हणटकच तें पत्र अधिकृत पुरावो थारतलेंच हाची खात्री ना. सांजवेळा खुद्द डीजीपीन प्रुडंट मिडियाक प्रतिक्रिया दिली. ह्या पत्राचेर कोणाची सय ना, तें खरें काय फट तें खबर ना, म्हजे वयले सगले आरोप तथ्यहीन आसात, पूजा शर्मा खंयच्याच पुलिसाच्या संपर्कांत येवंक ना, ह्या प्रकरणाची खोलायेन चवकशी जातली, तातूंत हांवें हस्तक्षेप करप योग्य थारचें ना, म्हजे सारको उंचेल्या पदा वयलो खंयचोच अधिकारी घुंवळे वखदां दवरून तुका आडकयतलों म्हणचोच ना, अशें तांणी सांगलें. काँग्रेसीच्या मतान, एसपीन पत्रकार परिशद घेवपाची गरज नाशिल्ली. ह्या प्रकरणाची सीबीआय चवकशी जावची. खुद्द डीजीपींचेर वयल्यान कोणाचें चेपण बी आशिल्लें काय, असोय दुबाव तांणी उक्तायला.
हें प्रकरण एप्रीलांत सुरू जाल्लें खंय. मात, बुलडोझरान घर मोडपाचे घडणुकेक लागून तें सोशल मिडियाचेर पावलें. गोंय आनी गोंया भायर तें पावोवपाचें सगलें स्रय सोशल मिडिया आनी ताचेर खबरो घालपी दिसाळ्यांक वता. गोंयकार चड भियेल्यात, कारण हे तरेची आनिकूय प्रकरणां जावं येतात. काँग्रेसीन पत्रकार परिशदेंत जमनी हडप करपाच्यो आमचे कडेन आनिकूय कांय कागाळी पावल्यात, असो दावो केलो. फक्त आनीक पुरावे मेळपाचे आसात. ते मेळटकच आमी तीं प्रकरणां उक्तडार हाडटले. आसगांव प्रकरणांतल्या ब्रोकराची चवकशी केल्यार बरीच म्हायती मेळूं येता, अशेंय तांणी सांगलें. एसआयटीन ते नदरेन चवकशी करूंक फावो. आतां मेरेन स जाणांक अटक जाल्या. तातूंत पांच बावन्सर आसात. भितरल्यो तीन बायलो. तांकां पगार कोण दिता, तांची संघटणा आसा काय, तांच्या वेवस्थापकाचें, धनयाचें नांव कितें हाचोय तपास जाल्यार बरो. गोंयांत खरेंच बावन्सरांची गरज आसा? कारण हेर राज्यांनी जशे लोक फुर्योज जातात, जाळपोळ, मारामारी करतात तशे नीज गोंयकार करिनात. हांगां स्थायीक जाल्ले कांय भायले केन्नाय आक्रमक जातात, ती गजाल वेगळी.
आसगांव प्रकरणान मोडणार मोडणां घेतल्यांत. आयज, फाल्यां आनिकूय व्होल्तां घेतिल्लीं दिसूं येतात. पूण कितेंय आसलें तरी खरें कितें तें भायर सरचें. गोंयच्यो उरल्यात त्यो जमनी, शेतां, भाटां, दोंगर आसा तशेच उरचे, गोंयच्या सैमाक बादा येवची न्हय. गोंयमातेचीय हीच इत्सा आसतली. तिचे कडेन पडमूर जाल्यार ती आमकां केन्नाच भोगसुची ना, हें सगल्यांनीच घट
मतींत दवरचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
