भांगरभूंय | प्रतिनिधी
डॉ. सुधा अश्वीनः 17 ते 19 डिसेंबर मजगतीं नवी दिल्लींत आयोजन
पणजी: नवी दिल्लींत 17 ते 19 डिसेंबर मजगतीं भारत मंडपम हांगा संवसारीक भलायकी संघटणेची, दुसरी संवसारीक परंपरीक वखद शिखर परिशद जातली. केंद्रीय आयुष मंत्रालया वतीन ही परिशद आयोजीत करतले. केंद्रीय आयुर्वेदीक संशोधन संस्थेचे संशोधन अधिकारी डॉ. सुधा अश्वीन हांणी ही म्हायती दिली. मंगळारा रायबंदरा जाल्ले पत्रकार परिशदेंत त्यो उलयताल्यो. ह्या वेळार डॉ. नंदिनी जाधव आनी हेर अधिकारी हाजीर आशिल्ले.
डॉ. सुधा हांणी सांगलें, हाचे पयलीं 2023 वर्सा गुजरातांत पयली परिशद येसस्वी जाल्ली. ही परिशद म्हणल्यार ‘सर्वे भवन्तु सुखिन:, सर्वे सन्तु निरामय:’ ह्या भारताच्या संकल्पने कडेन सुसंगत रावून मनीसपणा खातीर भलायकी, आनंद आनी कल्याणा खातीर परंपरीक वखद वेवस्थेक संवसारीक पांवड्यार मुखेल प्रवाहांत हाडपाच्या सामुहीक यत्नां मदलो हो एक म्हत्वाचो पांवडो आसा.
हे परिशदेंत संवसारभरांतल्या विवीध देशांतले भलायकी मंत्री, धोरणकर्ते, संवसारीक भलायकी मळा वेलीं आघाडीचीं व्यक्तीमत्वां, संशोधक, तज्ञ, उद्देग प्रतिनिधी आनी वैजकी वेवसायीक तज्ञ एकठांय येतले.
तशेंच 100 परस चड देश हे परिशदेंत वांटेकार जातले. ह्या वेळार अश्वगंधा ह्या भारताच्या सगल्यांत प्रसिद्ध आनी वैज्ञानीक पांवड्यार अभ्यास केल्ल्या वखदी वनस्पतीचेर एक समर्पीत कार्यावळीचें आयोजन करतले. परंपरीक आनी समकालीन भलायकी विशयक कार्यपद्दतींतल्या ह्या वनस्पतीचें म्हत्व हे कार्यावळींत अधोरेखीत करतले.
भारत परंपरीक वखदांच्या संवसारीक मळार फुडारपण करपी देश आसा. आयुर्वेद, योग आनी निसर्गोपचार, युनानी, सिद्ध, सेवा- रिग्पा आनी होमिओपॅथी अशा विवीध रुपांत आयुष वेवस्थेन शेंकड्यान शेंकडे लोकांची सेवा केल्या. संवसारभरांतल्या सर्वांगी भलायकी खातीर विस्वासार्ह पद्दत म्हणून लेगीत आपलें स्थान निर्माण केल्ल्याचें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
