भांगरभूंय | प्रतिनिधी
नवी दिल्ली, खबरां संस्था ः आयुष्मान भारत येवजण जनतेक मोफत भलायकी सेवा दिता. मोदी सरकारान 2018 वर्सा आयुष्मान भारत येवजण सुरू केल्ली. हे येवजणेंतल्यान पांच लाख रुपया मेरेन मोफत भलायकी सुविधा मेळटा. आतां मेरेन हे येवजणे खाला 34 कोटी परस चड आयुष्मान कार्ड तयार केल्यात. बुधवारा जाल्ले मंत्रीमंडळ बसकेंत सरकारान ह्या येवजणेंत व्हड बदल केला. 70 वर्सां वयर पिरायेच्या सगळ्या ज्येश्ठ नागरिकांक आयुष्मान येवजणेंत आस्पावन घेतले असो निर्णय मंत्रीमंडळ बसकेंत घेतलो.
34 कोटी वयर आयुष्यमान कार्डां
सरकारी आंकडेवारी प्रमाण आयुष्यमान भारत येवजणे खाला आयुष्मान कार्डांचो आंकडो व्हड प्रमाणांत वाडला. 30 जून 2024 मेरेन हो आंकडो 34.7 कोटी वयर पावलो. ह्या काळा मेरेन एक लाख कोटी रुपया मेरेन 7.37 कोटी दुयेंतींचे खर्च मंजूर केल्यात. हे येवजणे खाला देशभरांतल्या 29 हजारां परस चड नोंदणीकृत हॉस्पिटलांनी कॅशलेस आनी पेपरलेस भलायकी सेवा दितात.
6 कोटी ज्येश्ठ नागरिकां खातीर व्हडलो निर्णय
आयुष्मान भारत येवजणे संबंदी केंद्र सरकारान मंत्रीमंडळांत देशांतल्या 4.5 कोटी कुटुंबांतल्या 6 कोटी ज्येश्ठ नागरिकां खातीर व्हड निर्णय घेतला. ते प्रमाण तांकां पांच लाख रुपया मेरेन मोफत भलायकी सेवा दितले. खंयचोय ज्येश्ठ नागरिक हे येवजणे भायर सरकाराच्या हेर भलायकी सेवांचो लाव घेता जाल्यार तांचो आपोआप हे येवजणेंत आस्पाव जातलो.
अशें तयार करात आयुष्यमान कार्ड
हे येवजणेचो लाव घेवपाचो आसल्यार 14555 ह्या टोल फ्री क्रमांकाचेर फोन करूं येता. तातूंतल्यान तुमकां येवजण आनी पात्रताये विशीं म्हायती मेळटली. वा लागींच्या सीएससी केंद्रांत वचून कागदपत्रां सयत अर्ज करूं येता. अर्ज करतना आधार कार्ड, रेसिडेन्सी पुरावो, रेशन कार्ड आनी नोंदणीकृत मोबायल नंबर जाय पडटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
