भांगरभूंय | प्रतिनिधी
नवी दिल्ली, खबरां संस्था ः प्रधानमंत्री आयुष्मान भारत येवजणेचो विस्तार जायत आसा. सद्या कांय दुयेंसांचेर हे येवजणेंतल्यान उपचार करतात. तातूंत कांय असाध्य आनी हेर दुयेंसांचो आस्पाव जायना. पूण आतां सरकार हे येवजणे खाला हेर दुयेंसां खातीरूय उपचाराचे फायदे दिवपाची शक्यताय आसा. अल्जायमर, डिमेंशिया आनी हेर जायत्या दुयेंसांचो खर्च हे येवजणे खाला करपाक मेळटलो. 70 वर्सां आनी ताचे वयर पिरायेचे सगळे ज्येश्ठ नागरिक ह्या येवजणेंचो लाव घेवंक शकता अशें केंद्र सरकारान जाहीर केल्लें. ते उपरांत हे येवजणेचो विस्तार करून हेर असाध्य दुयेंसांचेर मुफत उपचार मेळटले.
राष्ट्रीय भलायकी प्राधिकरणान हे येवजणे खाला बदल करपाचो निर्णय घेतला. अजुनूय हेर दुयेंसांचो ह्या पॅकेजींत आस्पाव जातलो. पिराये संबंदीत दुयेंसांचो हातूंत आस्पाव केलां. ह्या दुयेंसांचो आस्पाव जाले उपरांत हे येवजणेचो लावार्थ्यांचो आंकडो वाडपाची शक्यताय आसा. सध्या 25 दुयेंसांचो हे येवजणेंत आस्पाव केला.
सुत्रांनी टीआयओ कडेन उलयतना दिल्ले म्हायती प्रमाण, तज्ञांची समिती हे येवजणेचो नियाळ घेवपा खातीर वावुरता. ही समिती नेमान AB-PMJAY तपासणी आनी नियाळ घेता. हे येवजणेंत आतां जाण्ट्यांच्या भलायके कडेन चड भर दितले. तशेंच वाडत्या पिराये संबंदीत दुयेंसांचेर ही समिती चड लक्ष दितली. हॉस्पिटलांत उपचार करपाची गरज आशिल्ल्या दुयेंसांचो हे येवजणेंत आस्पाव जाता. हाका लागून निदान जाले उपरांत रोखडेच उपचार करपाक सोंपें जातलें. स्ट्रोक, काळजाचें दुयेंस, कॅन्सर, आल्झायमर आनी डिमेंशिया सयत हेर दुयेंसांचो नव्यान हें येवजणेत आस्पाव जावपाची शक्यताय आसा.
भलायकी कार्ड आतां गूगलाचेर
आयुष्मान भारत हेल्थ कार्ड (ABHA ID) 2025 वर्सा सावन गूगल वॉलेटाचेर उपलब्ध जातलें. हाचे विशीं म्हायती गूगल ब्लॉगाचेर एका पोस्टांत दिल्या. हे येवजणेचो फायदो डिजिटल माध्यमांतल्यान लोकां मेरेन पावयतले. ही सुविधा आयुष्मान भारत डिजिटल मिशन (ABDM) खाला दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
