आयुष्मान भारत कार्डाक अर्ज कसो करचो?

भांगरभूंय | प्रतिनिधी

नवी दिल्ली, खबरां संस्था : ‘आयुष्मान भारत प्रधानमंत्री जन आरोग्य येवजण’ प्रधानमंत्री नरेंद्र मोदी हांणी देशांतल्या सामान्य लोकांक मोफत भलायकी सेवा दिवपा खातीर सप्टेंबर 2018 वर्सा सुरू केल्ली. हालींच ह्या येवजणेंत व्हड बदल केला. ते प्रमाण आतां 70 वर्सां वयर पिरायेच्या ज्येश्ठ नागरिकांक हे येवजणेचो लाव घेवंक मेळटलो.
आयुष्मान भारत येवजणे खाला आयुष्मान भारत कार्ड (Ayushman Bharat Card) करचें पडटा. ह्या कार्डा वांगडा लावार्थ्याक वर्साक 5 लाख रुपया मेरेन मोफत उपचार मेळूं येतात. हे येवजणे खाला देशांतल्या 29 हजारां परस चड हॉस्पिटलांनी नागरिकांक कॅशलेस आनी पेपरलेस भलायकी सुविधांचो लाव घेवपाक मेळटा. 30 जून 2024 मेरेन 34.7 कोटी लोकांक हे येवजणेचो लाव मेळ्ळा.

आयुष्मान भारत येवजणे खातीर पात्रताय

कच्ची घरां आशिल्ले लोक, जमनी नाशिल्ले लोक, गांवगिऱ्या वाठारांत रावपी लोक, तृतीयपंथी, गरिबी रेशे सकयल आशिल्ले लोक, अनुसुचीत जाती, अनुसुचीत जमाती, अर्थीक नदरेन दुबळे लोक (Economically Weaker Section) आनी उण्या उत्पन्नाच्या गटांतले लोक आयुष्मान भारत येवजणे खातीर अर्ज करपाक शकतात. तशेंच असंघटीत क्षेत्रांत काम करपी, मजुरी करून उदरनिर्वाह करपी हे येवजणेचो लाव घेवंक शकतात.
कुटुंबाचे कार्ड मेळोवपा खातीर कुटुंबातल्या सगळ्या वांगड्यांचो उल्लेख आशिल्ले वळखपत्र, आधार कार्ड, पॅन कार्ड, ड्रायव्हिंग लायसन्स, मतदार आयडी कार्ड आनी हेर खंयचेंय सरकारी आयडी कार्ड घेवन कॉमन सर्विस सेंटर वा यूटीआय-आयटीएसएल (UTI-ITSL) केंद्रांत वचचें. उपरांत थंय पात्रताय तपासात, येवजणे खातीर पात्र आसल्यार आयुष्मान कार्डा खातीर अर्ज करात.

आयुष्मान कार्ड ऑनलायन करपाक कितें करचें?

० तुमी गूगल प्ले स्टोरांतल्यान ‘आयुष्मान’ अॅप डावनलोड करूंक शकतात वा सरकारी संकेतथळाक भेट दिवन कार्डा खातीर अर्ज करपाक शकतात.
० अॅप डावनलोड केल्या उपरांत मोबायल नंबर घालात आनी लॉगीन करात.
० पात्रताय तपासात.
० पात्र आसल्यार आधार ई-केवायसी करात.
० फोटो अपलोड करात आनी कार्ड डावनलोड करात

खंयच्या दुयेंसांचेर उपचार?

हे येवजणे खाला कोरोना, कॅन्सर, मूत्रपिंड दुयेंस, काळजाचे दुयेंस, डेंग्यू, चिकनगुनिया, मलेरिया, डायलिसीस, धोपरा आनी हिप रिप्लेसमेंट, वांझपण, मोतीबिंदू अशा गंभीर दुयेंसांचेर मोफत उपचार करतात.