भांगरभूंय | प्रतिनिधी
भांगरभूंय । खबरां मेज
पणजीः गोंय सरकाराच्या भलायकी खात्यान पायलट प्रोजेक्साचो एक वांटो म्हणून गोंय इन्स्टिटयूट ऑफ मॅनेजमेंटाचे (जीआयएम) विद्यार्थी, प्राध्यापक, वांगडी आनी कर्मंचाऱ्यांक भारत भलायकी (आभा)आयडी दिल्या. आयुश्यमान भारत डिजिटल मिशन देशांत एकात्मीक डिजिडल भलायकी पायाभूत सुविधा तयार करपा खातीरचो एक बरो यत्न आसा.
सरकाराच्या भलायकी प्रशासना सयत जीआयएमचे विद्यार्थी राज्यांत आशिल्ल्या म्हाविद्यालयांच्या कॅम्पसांत आभा नोंदणेक उर्बां दिवपा खातीर वेगेवगेळी धोरणां विकसीत करतात तशेंच गोंय सरकार आपलो 14 आंकड्यांचो डीएचएस आभा आयडी पुराय गोंयच्या लोकांक दिवपा खातीर काम करता. तो दरेका वांगड्याक भारताच्या डिजिटल भलायकी सेवा यंत्रणेंत वांटेकार म्हणून वळखवपाक मजत करतलो.
जीआयएमच्या साखळे कॅम्पसांत हालींच जाल्ले हे नोंदणी मोहिमेचें उक्तावण भलायकी संचालक डॉ गीता काकोडकार आनी एबीडीएमचे नोडल अधिकारी डॉ केदार रायकार हांचे हस्तुकीं जालें. जीआयएमच्या ‘गिव्ह गोवा ‘ उपक्रमा खाला ही मोहीम आयोजीत केल्या. एबीडीएम वरवीं भारतीय भलायकी नोंदणी डिजिटल करतात. लॅब रिपोर्ट, दोतोरांचें प्रिस्किप्शन आनी हॉस्पिटलाचे हेर अहवाल ह्या उपक्रमाक लागून डिजिटल आनी पेपरलॅस जातले.
आधार आनी युपीआयच्या फुडारपणा खाला पेमेंट सिस्टम अर्थीक बाबतींत म्हत्वाची भूमिका कशें काम करता तशेंच भलायकी सेवेंत एबीडीएम-आभा डिजिटल परिवर्तनाक लागून राहणीमान सोपें जातलें. सर्व समावेशक भलायकी सेवा, सुदारीत गुणवत्ता आनी संशोधनांतल्यो नव्यो कल्पना चालीक लागतल्यो अशें अजय वामदेवन हाणी सांगलें.
आभा आनी एबीडीएम हें भारताले भलायकी सेवे खातीर गेम चेंजर थारतले अशें अजीत परुळेकारान सांगलें. ह्या वेळार उलयतना डॉ गीता काकोडकार हिणे आमी एका डिजिटायझ्ड, आधुनीक संवसारांत प्रवेश करतात आनी ती काळाची गरज आसा अशें सांगलें. देशातले भलायकी सेवेंत प्रगतीची लोकांक म्हायती करून दिवप गरजेचें आसा अशें तिणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
