भांगरभूंय | प्रतिनिधी
आ युर्वेद ही भारताक मेळिल्ली देणगी. मात ही उपचार पद्दत मदल्या काळांत फाटी पडली, हाका खूब कारणां आसात. एक म्हणल्यार आमचो भारतीयांचो आळस, आडनदर. दुसरी गजाल परकीयांचें आक्रमण. तिसरें कारण पयशे नाशिल्ल्यान संशोधन जायनासलें. हाका कारण आमची मानसिकताय. ती इबाडपाचें काम इंग्लीश भाशेन आनी ब्रिटिशांचे राजवटीन केले. सादें वाडदिसाचें उदाहरण घेवया. पयलीं आमी दिवली पेटोवन दवरताले. गोडधोड खाताले. मात आतां पश्चिमी पद्दतीन मेणवात पालोवपाचें काम करतात. केक कापतात. आतां सगलेच वाडदिसा दिवो पालोवपाक लागल्यात. ही आमची परंपरा न्हय. आमची भाशा आमी उलोवपाक लजूंक लागले. बऱ्याच गोंयकारांक आपली आवयभास उलोवपाक येना. मात 2014 त भोवमानेस्त नरेंद्रजी मोदी हांचें सरकार सत्तेर आयलें आनी तळागाळांत व्हडले बदल दिसपाक लागले. नवें शिक्षणीक धोरण आयलें. तातूंत आवयभाशेक, देशी भाशेक म्हत्व दिलां. जो बरोच बदल घडयत आसा. ताचो व्हडलो धपको इंग्लीश भाशेक बसपाक शकता. तिचेर परिणाम जावंक शकता.
ह्या बदलाचो एक भाग म्हणल्यार योग दीस. तो संवसारभर आमी पाळपाक लागले. शून्य ही गजाल आमी संवसाराक दिली. आयुर्वेदूय आमचोच. ती संवसाराक दितना आमी कसलीच अपेक्षा दवरूंक ना. एकदां खंय एक मुस्लीम सरदार भारतांत राज्य करपाक आयिल्लो. तो दुयेंत पडलो. संवसारभरांतले कितलेशेच दोतोर केले, पूण गुण पडना. कोणे तरी तांकां आयुर्वेद चिकित्सा पद्दतीचें नांव सांगलें. ताणें आपल्या गुरूक सांगले. गुरूक सरदारान अट घाली. उपचार कर, पूण धर्मा कडेन संबंदीत आडमेळीं येवपाक जायना. कायं दिसांनी सरदार दुयेंसांतल्यान बरो जालो. ताणें विचारलें, तुवें हें कशें केलें. गुरु म्हणपाक लागलो, हांवें एक चाटण तूं वाचता त्या धर्मग्रंथाच्या पानाक सकयल लायलें. पान परतूपाक तूं जिबेक बोट लावन ओलें करतालो. तेन्ना तें चाटण तुज्या पोटांत वतालें. ताका लागून तूं बरो जालो. खरें म्हणल्यार आनीक कोणूय आशिल्लो जाल्यार खोशी जावपाचो, पूण त्या सरदारान खंय त्या गुरुक जिवोच मारपाक सांगलो. ही इतिहासीक गजाल आनी आयुर्वेदाचें म्हत्व सांगपी.
आयज लेगीत अशीं दुयेंसां आसात, जीं फक्त आयुर्वेदूच बरीं करूंक शकता. मात ताचेर फावो तें संशोधन जायना. मुखेल गजा म्हणल्यार ते खातीर आमचे कडेन प्रयोगशाळा जरी आसल्यो तरी पयशे नात. हें सगलें सांगपाचे कारण म्हणल्यार आमच्या देशांतलें हें ज्ञान, भांडार नवे पिळगे कडेन पावोवपा खातीर मुंबय विवेकानंद प्रबोधिनी सुरू जाली. तांणी साबार कोर्स सुरू केले, तेय बी आॅनलायन. जाचो लाव सगल्यांक मेळचो हो एकमात्र उद्देश. तातूंतल्या योग, देवळां, आयुर्वेद म्हणा, हो अस्सल भारतीय खजिनो आमकां मेळटा. हे शिकोवप आयलेंच, तातूंत आयुर्वेदाचो प्रमाणपत्र अभ्यासक्रम जल्माक आयलो. हाचो खूब लाब इत्सुक आयुर्वेदीक दोतोराक जाता. आयुर्वेदाची आवड आसा, पूण जाका हें शिकपाची संद मेळूंक ना, अशा लोकां खातीर लेगीत वेबसायट आसा. vivekanandprabodhini ही तांची वेबसायट.
आयज कितलेशेच दुयेंती दुयेंत आसतना उपचार करतात, पूण तांकां म्हारग वखदां परवडनात. अशा वेळार सवाय आशिल्लीं आयुर्वेदीक वखदां देवासारकीं तांचे मजतीक धांवून येतात. अशें म्हणटात की रुख आसूं वा रोंप तातूंत वखदी गूण आसतात, तें आमकां वळखूंक येवपाक जाय. हो कोर्स करून तुमी दोतोर जातलेच, अशें म्हणू नजो. पूण तुमकां खंयच्या झाडांत, फळांत, पानांनी, मुळांनी वखदी गुण आसात, ते वळखुपाक कळटलें. तेन्ना तुमी संस्थेची वेबसायट दिल्या, तिचेर वचून म्हायती घेवं येता. फोन करपाचो आसा जाल्यार तुमी 9833571893 / 9820718022/ 9137580003 ह्या फोनांचेर संपर्क करूं शकतात. आयच्या आयुर्वेदा दिसा निमतान हाचो विचार जरूर करात.
डाॅ. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
