भांगरभूंय | प्रतिनिधी
भांगरभूंय । प्रतिनिधी
माशेलः आर्यवैद्य फार्मसी आनी ए व्ही पी रिसर्च फावंडेशन, कोईम्बत्तूर, तमीळनाडू हांणी आयोजीत केल्ल्या आयुक्विझ 2023 हे राष्ट्रीय पांवड्या वयले प्रश्नमंजुशा सर्तींत शिरोडें हांगच्या गोमंतक आयुर्वेद म्हाविद्यालय आनी संशोधन केंद्रांतल्या पदव्युत्तर विद्यार्थिनींक दुसरें इनाम फावो जालें. करंड, प्रशस्तीपत्रक आनी 50 हजार रुपये अशें ह्या इनामाचें स्वरुप आसा.
ही सर्त ए व्ही पी रिसर्च फावंडेशऩाचो संस्थापक पद्मश्री डॉ पी आर कृष्णकुमार हांचे यादी खातीर घेतात. सर्तींत भारतांतल्या आयुर्वेद म्हाविद्यालयांतल्यान फकत 16 म्हाविद्यालयांक प्राथमीक फेरयेंतल्यान वेंचून काडल्लें. उपरांत कोईम्बत्तूर हांगा उपांत्यपूर्व, उपांत्य आनी निमणी फेरी जाली. गोमंतक आयुर्वेद म्हाविद्यालयाच्यो पदव्युत्तर विद्यार्थिनी डॉ रश्मिना आमोणकार आनी डॉ अनुराधा पाटील हांणी हे सर्तींत आपल्या म्हाविद्यालयाचें प्रतिनिधीत्व केलें. तांका सर्ती खातीर डॉ पूजा शानबाग हे सहाय्यक प्राध्यापिकेन मार्गदर्शन केलें. राष्ट्रीय पांवड्या वयल्या ह्या येसा खातीर प्राचार्य डॉ अनुरा बाळे, उपप्राचार्य डॉ नीलेश कोरडे हांणी रश्मिना आनी अनुराधा हांकां परबीं भेटयलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
