आयिल्ल्या हरकतींची खात्री करूनच शिक्षणीक वर्सा विशींचो निर्णय घेतला : शेटगांवकार

भांगरभूंय | प्रतिनिधी

भांगरभूंय । प्रतिनिधी
पणजीः एप्रिलांत शिक्षणिक वर्स सुरु करपा खातीर राज्य शिक्षण संशोधन आनी प्रशिक्षण परिशदकडे (एससीइआरटी) 4 हजार परस चड हरकतीं आयिल्ल्यो. एससीइआरटीच्या स्टिरींग कमिटीन सगळ्या हरकत पत्रांची चाचपणी करून पालक आनी शिक्षकांनी उप्राशिल्ल्या प्रश्नांचे समाधान केले उपरांतच 7 एप्रिलांक शाळा सुरु करपाचो निर्णय घेतलां, अशें एससीइआरटीची संचालक मेघना शेटगांवकार हांणी सांगलें.
एप्रिलाचे 7 वेर नवें शिक्षणीक वर्स सुरू करपा खातीर शिक्षण खात्यान शुक्रारा परिपत्रक काडले उपरांत नवें शिक्षणीक वर्साची रुपरेषा कशी आसतली हाची एकंदरीत म्हायती दिवपा खातीर एससीइआरटीन आपल्या कचेरेत पत्रकार परिशद घेतिल्ली. ह्या वेळार शिक्षक संचालक शैलेश झिंगडे, एससीइआरटीची संचालक मेघना शेटगांवकार, गोंय शालांत मंडळाचे संचालक भागीरथ शेट्ये आनी हेर अधिकारी हजर आशिल्लें.
सुरवेक उलयतना शैलेश झिंगडे हांणी सांगलें, एप्रिला सावन शिक्षणिक वर्साची अंमलबजावणी करपा खातीर स्टिरींग समिती वेंचून हे खातीर नेम 21 सात सुदारणा केल्ली.
कांय जाण ह्या निर्णया आड न्यायालयांत गेले. पूण कायद्या प्रमाण नेम 21 सुदारणा करून हो निर्णय घेतला अशें सांगून न्यायालयान निर्णय आमचे फावरांत दिलो. 13 मार्चाक हरकतीं मागेवपा खातीर अधिसुचोवणी काडून आमी हरकतीं मागयल्यो आनी 4 हजार परस चड हरकतीं आयिल्ल्यो. एससीइआरटीन ह्या 4 हजार आक्षेपाची चाचपणी केले उपरांत शुक्रारा सुधारीत अधिसुचोवणी काडली, अशी म्हायती झिंगडे हांणी दिली.
सुधारीत अधिसुचोवणेत नवें शिक्षणिक वर्स यत्ता सवी ते धावी आनी बारावे खातीर 1 एप्रिला बदला 7 एप्रिलाक सुरू करून वर्ग सकाळीं 11.30 मेरेनच घेवपाचे थारायलें. शाळां खातीर सुटयेचे दिस जाहीर केल्यात आनी शिक्षणिक वर्ग 220 दीस सारके भरतात. पुराय मे म्हयनो सुट्टी आसतली आनी 4 जुनांक परत शाळा सुरू जातल्यो. पयली ते पांचवी आनी इकरावी मेरेनचे वर्ग जुनांत सुरू जातलें, अशें झिंगडे हांणी सांगलें.
आमकां सुमार 4047 हरकतीं आयिल्ल्यो तातुंतल्यो 3946 वैयक्तीक, 9 संघटनांनी घाल्ल्यो, 89 पालक शिक्षक संघान जाल्यार 3 राजकारण्यांनी घाल्ल्यो आशिल्ल्यो अशी म्हायती झिंगडे हांणी दिली.
निमणे दिसा एससीइआरटीकडेन सुमार 3 हजार हरकतीं आयले आनी शुक्रारा जाल्ले स्टिरींग समिती मुखार दवरून हरकतींची चाचपणी करून त्यो निकालांत काडल्यो. हरकतींत 20 मुद्दे मांडिल्ले स्टिरींग समितीन सगळे मुद्दे समजावन घेतले उपरांतच आपलो निर्णय दिलो अशें मेघना शेटगांवकार हिणे सांगून काय महत्वाचे मुद्याचेर उजवाड घालो.
पयलो मुद्दो वाडपी तापमानाचो आसलो. एप्रिलांत सीबीएसई आनी आयसीएसी शाळा सुरू जातात. तशेंच धावेचें रेमेडीयल वर्ग एप्रिलांतच जातात. भुरग्यांक गरमे पसून थाकाय दिवपा खातीर 11.30 वरां मेरेन आमी वर्ग काबार करतात. तशेंच उश्णतेचे ल्हार आनी तापामान वाड सारकिल्ली परिस्थिती आयल्यार शाळेक सुट्टी दिवपाचे निर्देश दिवपाचे स्टिरींग समितीचे बसकेत थारलें, अशीं म्हायती शेटगांवकार हिणें दिली.
शाळांनी साधन सुविधा ना अशो कागाळीं आयिल्ल्यो. युचआयडी पोर्टलाचेर सगळ्यो शाळा आपलो डेटा घालतात आनी गोंयच्या शाळांनी पियेवपाचें उदक सुविधा, चली आनी चल्यां खातीर वेगळे शैचालय, वर्गात फॅन सारकिल्ल्या सुविधांची म्हायती अपलोड केल्या अशें शेटगांवकार हिणे सांगलें.
तशेंच मुलभूत हक्काचे उल्लंघन जाल्यांचे हरकतींत म्हणिल्ले. पूण आमी सगळ्यांक आस्पावन घेवन कला विशयात नवें अभ्यासक्रम हाडल्यात आनी वेवसायिक शिक्षण सुरू करून 15 क्षेत्र थारयल्यात. विद्यार्थ्यांक जाय ते क्षेत्र वेंचपाची मेकळीक आसा. फक्त पुस्तका तोंड पाठ करून ती बरोवप हो आमचो हेत ना. आमी स्पर्धात्मक शिक्षण दिवपाचेर लक्ष केंद्रीत केला, अशें शेटगांवकार हिणे म्हणलें.
आमी भागधाराकां कडेन खूब कमी सल्लो घेतला असो दावो हरकतींत केला तो चुकीचो. शिक्षण सचिव हांचे फुडारपणा खाला एक पंगडान दरेक तालुक्यांतल्या शाळांचे वेवस्थापन, मुख्यध्यापक आनी शिक्षकांचो सल्लो घेतला. शिक्षक आनी शिक्षण तज्ञ मेळून आमी 20 समित्यो तयार केल्ल्यो, अशें शेटगांवकर हिणे सांगलें.