भांगरभूंय | प्रतिनिधी
मंडळ अध्यक्ष नेमणूकः पिरायेचे अटीक लागून भाजपाच्या मूळ कार्यकर्त्यां मदीं निरशेणी
पणजी: फाटल्या कांय वर्सांत काँग्रेसींतल्यान भाजपांत आयिल्ल्या चडशा आमदारांनी आपआपल्या मतदारसंघांतल्या भाजप मंडळ अध्यक्षपदार आपल्याच मर्जींतल्या मनशांची नेमणूक करपाक येस मेळयिल्ल्यान आनी पिरायेचे अटीक लागून संद गेल्ल्यान भाजपाच्या मूळ कार्यकर्त्यां मदीं मात निरशेणी पातळ्ळी. ताचे पडसाद फुडले वेंचणुकेंत दिसून येतले अशी प्रतिक्रिया कांय पदाधिकाऱ्यांनी आयतारा ‘भांगरभूंय’ कडेन उलयतना उक्तायली.
फाटल्या दोन दिसांत भाजपान 40 पैकीं 26 मतदारसंघांनी मंडळ अध्यक्षांची बिनविरोध नेमणूक केली. तातूंत नुवें मतदारसं सोडून काँग्रेसींतल्यान भाजपांत आयिल्ल्या चडशा आमदारांच्या मर्जींतल्याच मनशांची ह्या पदार नेमणूक केल्या. नुवें सयत, वेळ्ळी, बाणावली आनी मडकय हांगासरल्या मंडळ अध्यक्षांची नेमणूक अजून केल्ली ना. फुडारांतले राजकी आराखडे लक्षांत घेवनूच फुडल्या दोन दिसांत ह्या चार मतदारसंघांतल्या मंडळ अध्यक्षांची निवड जातली अशें गोपांनी सांगलें.
2017 तल्या विधानसभा वेंचणुके पसून आतां मेरेन काँग्रेसीच्या उमेदवारीचेर वेंचून आयिल्ले 18 आमदार भाजपांत दाखल जाल्यात. ताचे बगर पयलीं अपक्ष म्हणून वेंचून आयिल्ल्या दोन आमदारांनीय भाजपाच्या उमेदवारीचेर फाटली विधानसभा वेंचणूक लडोवन जैत मेळयलें. ह्या सगल्याच आमदारांनी आपआपल्या मतदारसंघांनी आपलेज मर्जींतलो अध्यक्ष करपा खातीर नेटाची फिल्डींग लायिल्ली. तातूंत सुमार सगल्यांकूच येस आयलां. अशे स्थितींत खूबशीं वर्सां पक्षाचें काम प्रामाणीक करून लेगीत आपल्याचेर अन्याय जाल्ल्याची भावना भाजपाच्या मूळ कार्यकर्त्यां कडल्यान व्यक्त जायत आसा.
पिरायेची अट थारली मारक
काँग्रेसीचे आमदार भाजपांत दाखल जाले उपरांत भाजपाच्या तरणाट्या पदाधिकाऱ्यांनी ह्या आमदारां कडेन लागसारपण जोडलें. तातूंतच पक्षान मंडळ अध्यक्षां खातीर उण्यांत उणी पिराय 45 वर्सां इतली केली. ताका लागून पिरायेचीं 45 वर्सा हुपिल्ल्या, पूण अटीक लागू वेंचणुकेच्या रिंगणांतल्यान भायर पडिल्ल्या खूबशा प्रामाणीक कार्यकर्त्यांचेर अन्याय जालो. पिरायेचे अटी विशीं ज्येश्ठ फुडाऱ्यां कडेन आक्षेप नोंद करून ही अट रद्द करपाची मागणी लेगीत आमी केल्ली. पूण फुडाऱ्यांनी आमचे मागणी कडेन पुरायपणान आडनदर केल्ल्याचें वेंचणूक लडोवपा खातीर इत्सूक आशिल्ल्या एका पदाधिकाऱ्यान स्पश्ट केलें.
येता ते वेंचणुकेचो विचार करूनच निर्णय
2027 वर्सा जावपी विधानसभा वेंचणुकेची तयारी भाजपान आतां सावनूच सुरू केल्या. ताचोच विचार करून मंडळ अध्यक्षांच्यो नेमणुको केल्यात. विधानसभा आनी ताचे पयलीं जावपी पालिका, जिल्हो पंचायत वेंचणुको स्वताच्या बळार जिखपा खातीरचे यत्न पक्षान सुरू केल्यात. ताचोच विचार करून मंडळ अध्यक्षांच्यो नेमणुको केल्यात. हेर पक्षांतल्यान आयिल्ले आमदार सद्या भाजपाचेच आसात. हें मतींत दवरूनच तांची मतां विचारांत घेतल्यात अशें भाजपाच्या एका वरिश्ठ फुडाऱ्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
