आयसीसी प्लेअर ऑप द मंथखातीर  कोहलीचें नामांकन

भांगरभूंय | प्रतिनिधी

खबरां संस्था
नवी दिल्लीः आंतरराष्ट्रीय क्रिकेट परिशदेन (आयसीसी) ऑक्टोबर म्हयन्याच्या ‘प्लेअर ऑफ द मंथ’ खातीर भारताचो स्टार बॅट्समन विराट कोहली सयत  दक्षीण आफ्रिकेचो डेव्हीड मिलर आनी झिम्बाब्वेच्या सिकंदर रझा हांची नांवा जाहीर केल्यांत. विराटाक पयलेच फावय प्लेयर ऑफ मंथ खातीर नामांकन मेळ्ळां.
विराट कोहली फाटल्या म्हयन्यांत फकत चार डाव खेळ्ळा. तातूंत ताणे यादींत उरपा सारक्यो खेळी केल्यो. ताणे पाकिस्ताना आड नाबाद 82 धांवड्यांची खेळी केली. त्या भायर गुवाहाडी हांणी दक्षीण आफ्रिके आड ताणें 28 बॉलांत नाबाद 49  धांवड्यो केल्ल्यो. कोहलीन 2022च्या टी 20 वर्ल्ड कपांत नेदरलँडा आड 44 बॉलांत 62 धांवड्यो केल्ल्यो. दक्षीण आफ्रिके आडचे मॅचींत मात तो सवाय भिरत  (12) आवट जालो. कोहलीचो ऑक्टोबर म्हयन्यांत  150.73 स्ट्रायक रेट आशिल्लो.
दक्षीण आफ्रिकेच्या डेव्हीड मिलर सध्या फॉर्मांत आसा. आक्टोबरांत गुवाहाटींत ताणे भारता आड 47 बॉलांत 106 धांवड्यांची खेळी केल्ली. टी 20 वर्ल्ड कपांत ताणे भारता आड नाबाद 59 धांवड्यो करून पंगडाक जैतिवंत केल्लें. ऑक्टोबरांत 146.37च्या स्ट्रायक रेटान तांणे 303 धांवड्यो केल्यात. झिम्बाब्वेच्या सिकंदर रझान ऑक्टोबर म्हयन्यांत बरी कामगिरी करून दाखयली. टी-20 वर्ल्ड कपांत आयर्लंडा आड ताणे 47 बॉलांत 82 धांवड्यो करून एक विकेट लेगीत घेतिल्ली. स्कॉटलंडा आड ताणे 23 बॉलांत 40 धांवड्यो आनी एक विकेट घेतली. वेस्ट इंडिजा आड तो चड कांय करपाक शकलो ना. पाकिस्तानाचेर जैत मेळयतना ताणे 35 धांवड्यांत तीन विकेटी घेतल्यो.