भांगरभूंय | प्रतिनिधी
आंतरराष्ट्रीय क्रिकेट समितीन (आयसीसी) गुरुग्राम हांगाचे एके कार्यावळींत भारतांत जावपी संवसारीक वन डे क्रिकेट सर्तीच्या शुभंकराचें अनावरण केलें. ह्या वेळार 19 वर्सां पिराये सकयले संवसारीक क्रिकेट सर्तीचे जैतिवंत बायलांच्या आनी दादल्यांच्या पंगड जैतिवंत भारताच्या बायलांच्या पंगडाची मुखेली शेफाली वर्मा आनी यश धूल उपस्थीत आशिल्लीं.
12 वर्सांनी शुभंकराचें पुनरागमन जालां. निमाणे खेपे 2011त भारतांतूच जाल्ले संवसारीक सर्ती वेळार शुभंकर लॉंच केल्लो. ते उपरांत 2015 आनी 2019तले संवसारीक सर्ती खातीर शुभंकर लॉंच करूंक नाशिल्लो.
आयसीसी प्रमाण नांव दवरूंक नाशिल्ल्या दादलो आनी बायल शुभंकर हो बायल दादलो समानतेचें प्रतिक आसा.
आयसीसीचे इव्हेंट हेड क्रिस टेट्लेन सांगलें, आमकां आयसीसी दादल्यांच्या संवसारीक वन डे सर्तीचो शुभंकर लॉंच करतना खूब आनंद जाता.
हो शुभंकर हो संस्कृती आनी शिमे मुखार वचून लोकांक एकठांय हाडपाचें काम करपी क्रिकेटीचें उत्कृश्ट प्रतीक आसा. हो शुभंकर दोनूय बायल आनी दादलो हांचें प्रतिनिधित्व करता. हो संवसारांत दादलो-बायल समानतेचो संदेश दिता अशें ताणें मुखार म्हणलें.
क्रिकेटीचो प्रसार फुडले पिळगेंत लेगीत करपाचो आयसीसीचो उद्देश आसा. हो उद्देश आयसीसीचो शुभंकर योग्य प्रकारान साध्य करता. ह्या शुभंकराक लागून भुरग्यां मदीं क्रिकेट विशीं दिर्घकालीन मोग निर्माण जातलो अशें ताणें मुखार सांगलें.
आयसीसीन शुभंकर अनावरण कार्यावळी वेळार ह्या शुभंकराक नांव दिवपाचे एके सर्तीची लेगीत घोशणा केली. ही सर्त 27 ऑगस्ट मेरेन चालू आसतली.
संवसारीक सर्त 5 ऑक्टोबर ते 19 नोव्हेंबर मेरेन भारतांत चलतली. उक्तावणाची मॅच इंग्लंड आनी न्युझिलॅण्ड ह्या पंगडां मदीं जातली. भारताची पयली मॅच 8 ऑक्टोबराक चेन्नय शारांत ऑस्ट्रेलिये आड जातली.1996त गुगली (तांबडो बॉल), 1999 – विलो (टोपी घाल्लो एक भुरगो), 2003 – डॅजलर (झेब्रा), 2007 – मेलो (रेकून), 2011 – स्टम्पी (हती) हे शुभंकर लॉंच केल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
