भांगरभूंय | प्रतिनिधी
आयज संवसार पाडवो. ते निमतान विशेश….
धोल, ताशे, रोमटां मेळ, चित्ररथ, तालगडी, गोफ, होळी, गुलाल विविध रीती, परंपरा हातांत हात घालून, परमळीत चाफ्याच्यो माळो घालून ओस्सय ओस्सय म्हणीत मौजमजा करपाचो शिगमो केन्ना सोंपलो आनो संवसार पाडव्याचें आगमन केन्ना जालें कळ्ळेंच ना. काल काय कडेन वीरभद्र, धुळवड मनयली.
आयज 19 मार्च, संवसार पाडवो. हिंदुंच्या नव्या वर्साची शुभ सुरवात. साडेतीन म्हूर्तां मदलो एक. घराची नितळसाण, दाराच्या दोनुय वटेन सुंदर रांगोळी. तातूंत ‘शुभ लाभ’ हीं अक्षरां घालतात. दाराक रोजां, आंब्याच्या पानांचीं तोरणां बांदिल्लीं, परंपरा आजुनुय अस्तित्वांत आसात. देवाघरान भक्तीभावान पुजा करतात. हळद आनी कुकूम देवाक ओंपतात, कापुर, उजवातीचो परमळ सबंद घरांत पातळता. वातावरण भक्तीमय जाता.
बायलो सोवळें ओंवळ्यान रांदचे कुडींत तरेकवार गोड जिनस करतात. त्या खमंग वासान भूक चाळवता. संवसार पाडव्याक मंगलमय वातावरण उंचायेर व्हरता. ह्या शुभ दिसाक बऱ्या कामाची सुरवात केल्यार काम रोखडेंच पुर्णत्वाक
वता. पाडव्याचो सण चैत्रात येता. सैम सामको पाचव्याचार झाडा, वेली, पानांनी नटिल्लो आसता. झाडाच्या टोकाक नाविन्याचो स्पर्श जाल्लो आसता, म्हणल्यार नवी कंवळी आंकरी, कोमरी फुट्टात. ह्या दिसांनी दीसभर उकाडो जाणवता. सांज वेळार मात्शें थंड दिसता. वाऱ्याची मंद झुळूक येता तेन्ना आंगाक शिरशिरी येता. मन प्रसन्न जाता.
चैत्र पाडव्याक घराचे फुडले वटेन तुळशी वृंदावनांत वा बाल्कनीत बांबू दवरतात. ताका रोजां, आंब्याचो ताळो आनी उमथो तांब्याचो कलश आनी जरीचो वेगळ्या रंगाचो कपडो बांदून, तो बांबु अर्थात घुडी जमनींत पुरुन उबी करतात. बाल्कनींन दवरल्यार, ती दोरयेन बांदून उबी करतात. मागीर तिची पुजा करतात. घुडी उभारप म्हणजे सुख, शांती, समाधान, समृद्धीचें प्रतीक.
घुडी उबारून नव्या वर्साची मंगलमय सुरवात करप. 30 -35 वर्सां पयलीं थारावीक घरांनीच घुडी उबारताले. मात आतां प्रत्येक घराचेर घुडी उबारपाची परंपरा सुरू जाल्या. फांतोडेर दादले धवें धोतर, कुर्ता, सदरो घालतात. भगवो वा हळडुवो फेटो बांदतात. बायला णववारी कापड नेसून, नाकांत नथ बी घालून भव्य मिरवणुक काडटात. श्रीरामाचो जयघोश करतात. फांतोडेर ही मिरवणुक वातावरणांत एक वेगळेच तरेची उमेद भरता. सगळे कडे उमेदीचीं ल्हारां पाताळतात. जो नो ल्हान, व्हड, भुरगीं, जाण्टो, नेण्टो उत्साही आनी प्रसन्न दिसता.
नवे व्हंकलेक तर त्या दिसा जो आनंद जाता तो शब्दांनी वर्णन करूंक शकना. तिका सांजवेळार तरातरांच्या भांगराच्या वस्तींनी, फुलांनी सजयतात. कुळाराची सून तिका पाचव्याचार वस्त्रांनी सजयतात. माथ्यार भांगराची फुल्लां माळटात, पांच सवाशिणी तिची खण नाल्लान ओटी भरतात. घरा आयिल्ल्या सवाशिणींचें मानपान करतात.
खरेंच संवसार पाडवो म्हणल्यार नव्या संवसाराची भांगराळी वाटचाल. सगळ्यांचो मांगल्याचो घुडीपाडवो. चैतन्यमय प्रसन्न वातावरण. घरात सुख ,समृद्धी, समाधान आनी आरोग्य हांचो मोलादीक खजानो. नव्या वर्साचीं सगल्यांक परबीं.
सिद्धी तिळवे
7972535321
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
