भांगरभूंय | प्रतिनिधी
मानकुराद हळडुवो आंबो हो फळांचो राजा. ताची रुच उतरांनी वर्णन करपाक मेळचीना. झाडपिको मेळत जाल्यार ते सर्गसुखच.
कुलकुल्याचें शिंयान केन्ना पळ काडलो कळ्ळेंच ना. आतां गर्मी आपलें रुप दाखोवपाक लागल्या. घामोच्यो पांवळ्यो व्हांवपाक लागल्यात. दीसभर, रातभर फॅन, एसी लायले बगर न्हीद पडना. तातूंत रातची लायट गेल्यार चड त्रास जातात,
गर्मी म्हणल्यार तकली फोडूच . जीव खासावीस जाता. ताळो परत परत सुकून येता. तान लागतूच रावता. लिंबू सरबत करूंक गेल्यार लिंबाचें मोल तेंगशेर पावलां. जिऱ्या कोंथमिरीचें घरच्या घरा केल्लें उदक पियेन दिसता. जिवाक थंडाय मेळटा. आडसराचें उदक सामकें बरें, पूण तांचें मोल दर्यादेगांचेर शंबर रुपयांचेर आनी शारांनी पन्नास रुपयांचेर पावलां.
गर्मेच्या दिसांनी वसंत रुतूचें आगमन जाता. आयलो आमचो वसंत राजा, उमेदीचें वारें घेवन अशेंच सगल्यांक जाता. प्रत्येक झाडाक कुचकुचीत पाचवे आंकूर कोमऱ्यो फुट्टात. पोरणीं पानां झडून नवीं पानां किल्लतात. झाडाक नवे व्हंकले प्रमाण नव्या पानांचो साज चडटा. सैम सामको नट्टा. वचत थंय झाडाक ल्हान ल्हान फळां, फुलां दिसतात. पणस, तोरां, मुट्टे, आंबे झाडांचेर धोलपाक लागता. सध्या आंबो आयला, पूण खूब म्हारग. सामान्य मनशाच्या बोल्साक परवडपाचो ना.
वसंत रुतू सगल्यांच्या मोगाचो, अपुरबायेचो. ताची सुलूस सगल्यांक लागता ती कोकिळान आपल्या म्होवाळ आवाजान ताका येवकार दितकच. फांतोडेर हांथरुणाचेर आसतनाच कोकिळाचो कुहू कुहू आवाज कानार सादवता. मन धादोस जाता त्या सर्गीय आवाजान. वसंत आयलो हें कळपाक वगत लागना. ताच्या आगमना उपरांत फळांचो मौसम सुरू जाता. सगल्या वाठारांत पणस, आंब्यांचो जिबेक उदक हाडपी परमळ पातळटा. केन्ना ते झाडाचेर पिकतात आनी आमकां खावपाक मेळटात, अशें जाता. ते मोव घरे, मुट्ट्यांचो रोस पियेन दिसता. मानकुराद हळडुवो आंबो हो फळांचो राजा. ताची रुच उतरांनी वर्णन करपाक मेळचीना. झाडपिको मेळत जाल्यार ते सर्गसुखच.
ह्याच वसंतांत रानमेवो पिकता. पूण ते खातीर रानांनी वच्चें पडटा. आतां गोंयांत चड रानां उरूंक नात. झाडांचेर काण्णा, चुन्ना, जांबळां, धवे फुल्ल जाम, भिंड्डां, चाफरां, चारां पिकतात. ही सैमाची देणगी वर्सांतल्यान एकदांच मेळटा. आतांचे पिळगेक हो रानमेवो पयशे दिवन बाजारांतल्यान विकत हाडून खावचो पडटा. आतां झाडांय उणीं जाल्यांत.
एका तेंपार शाळांनी वचपी सगलींच भुरगीं, सुटयेंत येवपी सोयरे रानांनी वताले, रानमेवो हाडटाले. हरवीं काण्णां खळाक घालताले. ताचें लोणचें करताले. पावसाच्या दिसांनी हुनहुनीत उकडे पेजे वांगडा खाताले.
पिकिल्लीं जांबळां भलायकेक एकदम बरीं. काण्णां तर सामकीं रसरशीत. वसंत रुतून रानमेवो खावपा सारकें दुसरें सुख ना. वसंत रुतू जरी गर्मी हाडटा तरी सगल्या सैमांत उमेदीचें वारें झुळझुळटा. नवचैतन्याची वाऱ्याचीं ल्हारां मनाक प्रसन्न करतात. वसंत म्हणजे मनशाक सैमान दिल्लें सर्गीय सुख. ताका उमेदीन येवकार दिवया.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
