भांगरभूंय | प्रतिनिधी
केंद्रान धाडिल्ल्या निधींतले गोंयान वापरले 14.52 कोटी
भांगरभूंय । प्रतिनिधी
पणजीः केंद्रांतल्यान गोंय सरकाराक आयल्ल्या 16.76 कोटी रुपया निधींतले 9.52 कोटी परतून केंद्राक गेल्यात. फाटल्या चार वर्सांत ह्या निधीचो वापर करुंक नाशिल्ल्यान आनी हेर तांत्रिकी कारणांक लागून हो निधी परतून गेला. तशेंच फाटलीं चार वर्सां गोंय सरकाराचे तिजोरेंत 14.52 कोटी रुपयांचो निधी वापराविणें पडून आसा, अशी म्हायती वित्त मंत्री डॉ. प्रमोद सावंत हांणी लेखी जापेंत दिल्या.
गोंय सरकाराक केंद्र सरकारा कडल्यान कितलो निधी आयला आनी ताचो वापर कितलो जाला, असो प्रस्न मडगांवचे आमदार दिगंबर कामत हांणी विधानसभेच्या पटलार विचारिल्लो. हाचेर लेखी जाप दितना मुख्यमंत्र्यान म्हाणलां, 9 सरकारी खात्यांक 16.76 कोटी रुपयांचो निधी आयल्लो आनी तातूंतले 9.52 कोटी परतून गेल्यात.
गृह खात्याक 23,92,000 रुपयांचो निधी आयल्लो. तातूंतले 2,98,853 रुपया दिल्ले मुजती भितर खर्च करूंक नाशिल्ल्यान हे पयशे वर्स 2021-22 त परतून केंद्राक गेले. शेतकी खात्याक अनुदानाचे पयशे दिवपा खातीर केंद्रा कडल्यान 18,82,900 रुपया आयल्ले, पूण ही रक्कम राज्य सरकारान रिव्हेलिडेट करूंक ना. हे खातीर हे पयशे 2021-22 त परतून केंद्राक दिवचे पडले. ते भायर प्रधानमंत्री कृशी शिंपणावळ येवजणे खाला 1.02 कोटी आयिल्ले, पूण ह्या निधीचे रिव्हेलिटेशन करूंक नाशिल्ल्यान हे सगळे पयशे 2021-22 त परतून केंद्रांक दिवचे पडले.
उजो पालोवपी दळाक 2 कोटी रुपयांचो निधी मेळिल्लो. तातूंतले फक्त 1.89 कोटी खर्च केले आनी उरिल्ले पयशे 2021-22 त परतून केंद्राक धाडले. गोंय पुलिसांक निर्भया येवजणे खाला केंद्रांतल्यान 3.76 कोटी आयिल्ले. तातूंतले सरकारान 2.42 कोटी वेर्णा फोरेन्सीक लॅबांत डीएनए फिंगरप्रींट विभाग उबारपा खातीर खर्च केले. उरिल्ले 1.33 कोटी 2023-24 त केंद्रीय गृह मंत्रालयान राज्याच्या भौशीक अर्थीक वेवस्थापन यंत्रणेच्या बॅक खात्यांत ट्रान्सफर केल्यात.
आयुश मंत्रालयान गोंयच्या भलायकी खात्याक 5.86 कोटींचो निधी दिल्लो. तातूंतले 75 टक्के निधीचो वापर करप सक्तीचें आसलें. पूण राज्य सरकारान फक्त 48 टक्केच ताचो वापर केल्ल्यान उरिल्ले 3.15 कोटी 2021-22 त केंद्राक परतून गेले.
रान खात्याक 1.17 कोटी निधी केंद्रीय पर्यावरण, रान आनी हवामान बदल मंत्रालयान दिल्लो. तातूंतले 78.72 लाख रान खात्यान खर्च केले, उरिल्ले 38.32 लाख वापराविणें पडून आशिल्ल्यान हो निधी 2022-23 त परतून गेलो. ते भायर ह्याच वर्सा भितर परतून एक फावट रान, पर्यावरण आनी हवामान बदल खात्यान परतून 28.53 लाखांचो निधी रान खात्याक धाडलो. पूण केंद्रान तांचे रिव्हेलीडेशन करूंक नाशिल्ल्यान हो निधी पडून उरलो देखून हो निधी 2022-23 त परतून धाडलो. सामाजीक न्याय आनी सक्षमीकरण मंत्रायलायान समाज कल्याण खात्याक 1.96 कोटी रुपयांचो निधी धाडिल्लो. पूण ह्या पयशांचें वितरण करपा खातीर खात्यान सिंगल नोडल एजन्सीचें खातें दिल्ले मुजती भितर उक्तें करूंक ना. ते खातीर हे सगळे पयशे 2023-24 त परतून गेले.
केंद्रीय गिरायक वेव्हार खात्यान सोसायटींनी रेशन घेवपाची टीडीपीएस यंत्रणा कंम्प्युटरायज्ड करपा खातीर 2.80 कोटी दिल्ले. पूण ही येवजण पुराय चालीक लागले उपरांत उरिल्ले 87.06 लाख 2023-24 त केंद्राक परत धाडले. उच्च शिक्षण संचालनालयाक केंद्रांतल्यान 18.96 लाख निधी आयिल्लो. हो निधी तसोच दवरून ताचो वापर करपाची मुजत सोंपिल्ल्यान हो निधी केंद्राक 2020-21 त परतून दिवचो पडलो. ते भायर 2020 ते 2024 मेरेन 14.52 कोटींचो निधी गोंय सरकाराचे तिजोरेंत पडून आसा. 2020-21 त 40.77 लाख, 2021-22 त 3.25 कोटी, 2022-23 त 1.69 कोटी, 2023- 24 त 9.17 कोटींचो निधी वापराविणें पडून आसा, अशें जापेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
