भांगरभूंय | प्रतिनिधी
सध्या गोंयांत कुलकुल्याचे थंडेचो मौसम सुरू आसा. सांजवेळार सुर्या अस्ताक गेलो काय थंडी आपलें रुप दाखोवंक लागता. थंड, शीतळ वाऱ्याची झुळूक आंगाक शिरशिरी हाडटा. धवो फुल्ल दंव सगल्याक पातळटा. मनशाक मनीस, गाडयेक गाडी दिसना अशें रस्त्यार धुंवटें दाटून येता. अशा वेळार अपघात जावपाची भिरांत आसता. गाडयेच्यो फुडल्यो, फांटल्यो हेडलायटी पेटोवच्यो पडटात. राज्यांत अचकीत थंडेचो पारो देंविल्ल्यान सांजवेळ जालो काय ल्हान, व्हड सगलीं स्वेटर, कानतोपी, मफलर, उबदार कपडे घालून फिरतना नदरेक पडटा. ह्या दिसांनी पांय पसून धांपूंक जाय. हातमोजे, पांय मोजे घालप खरेंच बरें.
थंडेच्या दिसांनी जोर, खोकलेचो सगल्यांकूच त्रास जाता. हवामानांत दिसान दीस बदल जाता. केन्ना दमट, कडकडीत वत, मदींत पावस, थंडी… वातावरणांत असो बदल जाल्ल्यानूच तरातराचीं दुयेंसां जावपाक लागल्यांत. केन्ना जोर येता, नांक व्हांवता, ताळ्या कडेन खंवखंवता, कान खोरजता, ताळो सुकता, खोंकली येता ती थांबच ना. हड्ड्यांत दुखता, तोंडाक रुच आसना, भूक लागना, शिंको येतात…. प्रत्येकाक वेगवेगळ्यो समस्या. तांचेर उपाय म्हणल्यार आलें घालून केल्लो च्या पियेवप. आल्यांत सोडियम, पाॅटेशियम, व्हिटामीन बी, सी, झिंक बी आसता. ताका लागून हुडहुडी भरना. आलें आनी तुळशीचो काडो पियेल्यार थंडी पसून सुटका जाता. गरम दूद हळद घालून हुनहुनीत पियेवप बरें. हाडां आनी स्नायू दुखपाचें बंद जाता. खोकली ना जाता. तेल गरम करून दोन थेंब नाकांत घालात. गळ्यांतली समस्या आसल्यार दुगदुगीत उदकांत मीठ घालून घोट घेयात. आंवाळ्याचो रोस पियेल्यार प्रतिकार शक्त वाडटा. जायते लोक कांदो आनी आल्याचो रोस गरम करून पियेतात. खोंकली उणी जाता. भुरग्याक उदक पियेवपाक दिवप, म्हणटकच तांचे कुडीक जाय तितली उर्जा मेळटा. कुडिंतले विखारी घटक भायर पडटात.
काल्या, जात्रेक वतना वूलन कपडे, स्वेटर, मफलर, कानतोपी, मोजे घालपाक विसरूं नाकात. अचानक तापमान देंविल्ल्यान जिवाची जतनाय घेवप बरें. सदांच गरम जेवण, नाश्तो घेयात. दनपरां, रातचे वेळार जेवात. दनपरां तीन, रातचीं साडेधा हो जेवणाचो वेळ न्हय. थंडी हो बरो मौसम. पूण भलायकेची काळजी घेतल्यार.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
