भांगरभूंय | प्रतिनिधी
नवी दिल्ली, खबरां संस्था : भारता सयत 98 देशांतल्या आयफोन वापरप्यांक ऍपलान एक अलर्ट मॅसेज जारी केला. तांचे फोन पेगासस सारकिल्या स्पायवेअर हल्ल्यांक बळी (हॅक) पडपाक शकतात, अशें तातूंत म्हणलां. पेगासस हें इस्रायलाचे एनएसओ हे कंपनीन तयार केल्लें गुप्तचर (हेरगिरी करपाचें) सॉफ्टवेअर. हाच्या आदारान गुप्तचराचें काम सहजपणान करूं येता. स्पायवेअर वरवीं हें फोनांत इन्स्टोल जाता.
ऍपलाच्या म्हणण्या प्रमाण हे खेपे पेगासस न्हय, पूण कितलेशेच किलोमिटर पयस बसून कोण तरी अशाच स्पायवेअरान आयफोन हॅक करपाचो यत्न करता. अशे हल्ले पुरायपणान सोदून काडप शक्य ना. पूण ही आमी दिल्ली शिटकावणी योग्य आसा. देखून आमच्या अलर्टांक गंभीरतायेन घेयात.
ऍपलान वापरप्यांक शिटकावणी दिवपाची ही पयलीच खेपेची गजाल न्हय. एप्रीलांत तांणी 92 देशां खातीर अशीच शिटकावणी दिली. 2021 वर्सा सावन कंपनी 150 परस चड देशांक अलर्ट धाडटा. सद्या संवसारांत 1 अब्ज 33 कोटी 40 लाखां वयर लोक आयफोन वापरतात. फाटल्या वर्सा परस तातूंत 8.37% वाड जाल्या. 2022 वर्सा भारताच्या स्मार्टफोन बाजारांत पूण ऍपलाचो वाटो 4.6% आशिल्लो.
फाॅरेन्सीक चांचणी करप शक्य
कोणाकय ऍपला कडल्यान संदेश आयल्यात आनी ताका कितें तरी चुकीचें आसा असो दुबाव आयला जाल्यार तांणी www.accessnow.org चेर वचून तुमच्या फोनाची फाॅरेन्सीक चांचणी करपा खातीर दिल्ल्या सुचोवण्यां प्रमाणें वागचें. ऍपल तुमकां सॉफ्टवॅर अपडेट करपाक सांगता जाल्यार, रोखडेंच करचें. एसएमएस वा खंयचेय मॅसेजी वरवीं दुवो मेळ्ळो जाल्यार ताचेर केन्नाच क्लिक करचें न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
