भांगरभूंय | प्रतिनिधी
क्लब आनी पुलिसां खातीर काम करता एक समन्वयक
पणजी : बर्च बाय रोमिओ लेन ह्या नायट क्लबा आड एका आयपीएस अधिकार्याच्या हस्तक्षेपाक लागूनच थळाव्या पुलिसांक कारवाय करप शक्य जावंक ना. आवाजा आड नोंद जाल्ल्या एफआयआरींतल्यानूय नांव रद्द करपा खातीर आयपीएस अधिकार्यान चेंपण हाडिल्ल्याची म्हायती थळाव्या पुलिसां कडल्यान मेळ्ळी.
ह्या क्लबाचो वेपारी परवानो (ट्रेड लायसन) २०२४ त सोंपिल्लें. हे फाटभूंयेर आयपीएस अधिकार्यान पुलीस निरीक्षकां सयत थळाव्या पुलिसांक कारवाय करपाक सांगिल्लें जाल्यार शेनवारा रातची दुर्घटना टाळप शक्य जावपाचें. हाका लागून शेनवारची घडणूक कांय प्रमाणांत मनशाक लागूनच जाल्या, अशें एका पुलिसान सांगलें.
हणजूण पुलीस तशेंच गुन्यांव फांट्यान क्लबाक परवाने/ कागदपत्रां दाखोवपाच्यो नोटिसो जारी केल्ल्यो. तरी नोटिशी उपरांत थळाव्या पुलिसांक फाटपुरवण करपाक त्या आयपीएस अधिकार्यान दिवंक ना.
२०२४ चे लोकसभा वेंचणुके पयलीं हणजूणचे तेन्नाचे पुलीस निरीक्षक प्रशल नायक देसाय हांणी ह्या क्लबा कडेन परवान्यांची कागदपत्रां मागिल्ली. मात आयपीएस अधिकार्याक लागून कारवाय करप शक्य जावंक ना. हो आयपीएस अधिकारी आतां निवृत्त जाला. उपरांत गुन्यांव फांट्याचे तेन्नाचे उपअधीक्षक राजेश कुमार हांणीय ह्या क्लबाक नोटीस धाडिल्ली. त्याच आयपीएस अधिकार्यान उपअधीक्षक राजेश कुमार हांकांय कारवाय करपा पसून आडायिल्ले.
उपरांत फाटल्या ऑगस्टांत तेन्नाचे पुलीस निरीक्षक परेश नायक हांणीय व्हड आवाजांत संगीत वाजयिल्ले खातीर हणजूणच्या ५ क्लबां आड एफआयआर दाखल केल्ली. तेन्नाचे पुलीस उपअधिक्षक संदेश चोडणकार हे तपास करताले. तांचेरूय दोग आयपीएस अधिकार्यांचें चेंपण आयिल्लें, अशें एका पुलिसान सांगलें.
क्लबांत लागिल्ल्या उज्या उपरांत सरकारान तीन थळाव्या अधिकार्यांक निलंबीत केल्यात. मात एकाय आयपीएस अधिकार्या आड कारवाय जावंक ना. आयपीएस अधिकार्यांक सरकार फाटीं घालता काय कारवाय करता, हाचे कडेन आतां सगल्यांचे लक्ष लागलां.
मजगतीं, कांय वर्सां आदीं क्लब वेवसायांत आशिल्लो एक मनीस आतां हणजूण, हडफडें वाठारांतले क्लब आनी पुलीस हांचे मदलो दुवो जावन अर्थीक वेव्हारांत ‘समन्वयका’ची भुमिका करता, अशीय म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
