भांगरभूंय | प्रतिनिधी
पणजी : सध्या चालू आशिल्ल्या इंडियन प्रिमियर लीग (आयपीएल) क्रिकेट मॅचींचे फाटभुंयेर गोंयांत विवीध वाठारांनी चलपी ऑनलायन बेटींग घेवपी रॅकेटाचेर पुलिसांनी व्हड कारवाय केल्या. गोंय पुलिशेच्या गुन्यांव फांट्यान आनी कळंगूट पुलिसांनी घातिल्ले धाडींत 36 जाणांक अटक केल्या. तांचे कडल्यान 40.95 लाखां परस अदीक मोलाचे मोबायल फोन, लॉपटॉप आनी जुगारा खातीर वापरतालें तें साहित्य जप्त केलां.
गोंयांत व्हड प्रमाणार आयपीएलाचेर ऑनलायन बेटींग चालू आशिल्ल्याची म्हायती गोंय पुलिशेच्या अधिकाऱ्यांक मेळिल्ली. ते प्रमाण गुन्यांव फांट्याचे अधिक्षक राहूल गुप्ता आनी उपअधिक्षक राजेश कुमार हांच्या मार्गदर्शना खाला निरिक्षक प्रशल नायक देसाय आनी लक्षी आमोणकार हांच्या फुडारपणा खाला पंगडान बांबोळे हॉली क्रॉसा फाटल्यान आशिल्ले इमारतींत तशेंच नागवा – वेर्णेच्या पंजाब नॅशनल बँके लागसार धाड घालून 34 जाणांक अटक केली. तांचे कडल्यान 40 लाख मोलाचे 101 मोबायल, 11 लॅपटॉप, 95 बँक पासबूक, 145 एटीए कार्ड, 54 सीम कार्ड आनी हेर वस्तू जप्त केल्यो.
ह्या प्रकरणांत अटक केल्ल्या दुबावितां आड गोंय भौशीक जुगार कायद्याचे कलम 3 आनी 4 खाला गुन्यांव दाखल करून कारवाय केली. मजगतीं, बांबोळेच्या प्रकरणांत अटक केल्ल्या 8 जाणांक पणजी प्रथमवर्ग न्यायालयान दोन दिसांची पुलीस कोठडी, जाल्यार नागवाच्या प्रकरणांत अटक केल्ल्या दुबावितांक मडगांवच्या प्रथमवर्ग न्यायालयांत हजर केले तेन्ना न्यायालयान स दीस पुलीस कोठडी फर्मायली.
कळंगूटे कारवाय
कळंगूट पुलिसांनी 8 ते 9 एप्रील ह्या काळांत सिकेरीच्या ‘सन अॅण्ड सॅण्ड’ अपार्टमेंटांतल्या एका फ्लॅटाचेर धाड घालून फनींद्र वर्मा (37) आनी वेजंडला साई बाबू (36) ह्या दोगांक आयपीएल मॅची वेळार ऑनलायन बेटींग घेतना रंगेहाथ धरले. तांचे कडल्यान 10 मोबायल फोन, 1 लॅपटॉप आनी हेर वस्तू मेळून सुमार 95 हजार रुपयांचें सामान जप्त केलें. ही कारवाय उत्तर गोंयचे अधिक्षक अक्षत कौशल आनी उपअधिक्षक विश्वेश कर्पे हांच्या मार्गदर्शना खाला, तशेंच कळंगूटचे पुलीस निरिक्षक परेश नायक हांच्या फुडारपणा खाला उपनिरिक्षक साहील वायंगणकार आनी ताच्या पंगडान केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
