भांगरभूंय | प्रतिनिधी
आयपीएल सुरू जावचें पयलींच आयपीएला विशीं चर्चा सुरू जाता. जसो मार्च म्हयनो लागीं येता तसो खास करून सगल्या तरणाट्या भुरग्यांच्यो नदरो आयपीएला वटेन लागतात. केन्ना एकदां आयपीएलाक सुरवात जातली आनी दर एकल्याक आपल्या आवडट्या खेळगड्याक तशेंच आपल्या आवडट्या पंगडाक खेळां मळार खेळटना पळयन अशेंच दिसता. आयपीएल म्हणल्यार स्टार खेळगडे तयार करपी एक फॅक्टरी अशी ताची वळख जाल्या.
टीव्ही मुखार दोन तीन वरां कशीं वतात तेंच कळना. कसलेंय काम आसूं वा अभ्यास आसूं टीव्ही सोडून कुशीक वचप खास करून आयच्या तरणाट्यां खातीर जिवार येता. फक्त तरणाटेच न्हय तर ल्हान-व्हड सगलेच आयपीएलाच्या हुंवारांत व्हांवून वतात. ताच्या मोगांत पडटात. प्रेक्षकांकूय आतां आक्रमक खेळ पळोवपाक आवडूंक लागलां.
तशें पळोवंक गेल्यार पयलीं तेंपार पन्नास ओवरींच्या खेळांत 270/ 280 धांवड्यो जावप म्हणल्यार खूब जातालें. पूण आतां वीस ओवरींत 280/290 धांवड्यो जातना दिसतात. पन्नास धांवड्यो काडपाक पंदरा ते वीस बॉल पुरो जातात. तीस- चाळीस बॉल खेळून बॅटसमन शेंकडो मारतना दिश्टी पडटा. तशें पळोवंक गेल्यार आयपीएलान किक्रेट खेळाचें रुपच बदलून उडयलां अशे म्हणल्यार अतिताय जावची ना. बऱ्याची गजाल म्हणल्यार दर एकलो खेळगडो आपल्या पंगडा खातीर बरें कितें तरी करून दाखयतलों हेच भावनेन खेळटना दिश्टी पडटा.
दर एका गजाली फाटल्यान फायदो लुकसाण हें आसताच. पूण आयपीएला फाटल्यान लुकसाणा परस फायदोच चड जातना दिश्टी पडटा. 2008 वर्सां सुरवात जाल्ले हे सर्तीक अंदूं अठरा वर्सां पुराय जातात. अंदूंचें हें अठरावें आयपीयल. जेन्ना सावन आयपीएलाक सुरवात जाली तेन्ना सावन भारतीय आंतरराष्ट्रीय क्रिकेट पंगडा विशीं उलोवपाचें जालें जाल्यार विराट कोहली, ऋषभ पंत, रिंकू सिंह, शुभमन गिल, यशस्वी जायसवाल, श्रेयश अय्यर, संजू सॅमसन, शिवम दुबे, ऋतुराज गायकवाड, विघ्नेश पुथ्थूर अशे कितलेशेच एका परस एक बरे बरे खेळगडे आयपीएलान दिले.
आयपीएलांत बरी कामगिरी केल्ल्यान ह्या खेळगड्यांक भारतीय पंगडांत प्रवेश मेळ्ळो. आयपीएल म्हणल्यार भारतीय पंगडांत प्रवेश करपाचें प्रवेशदार. ताका लागूनच आयपीएलांत बरी कामगिरी करपा खातीर खेळगडे मैदानार घाम गळयतात. आयपीएलांत बरी कामगिरी करून भारतीय पंगडांत प्रवेश मेळोवपाचें सपन सगलेच खेळगडे पळयतात. तें सपन येसस्वी करपा खातीर बरो खेळ करपाचो तांचो यत्न आसता. ताका लागून आयपीएलाच्यो सगल्यो मॅची बऱ्यो जातात आनी प्रेक्षकांक खेळाचो आनंद घेवंक मेळटा. तशेंच संवसारांतल्या वेगळ्या वेगळ्या देशांतल्या खेळगड्यांक लेगीत आपलो खेळ दाखोवपाची संद आयपीएल दिता अशें म्हणल्यार चूक जावची ना.
आयपीएल हें दर वर्सां थारिल्ल्या वेळा प्रमाण जाता, आनी हाचें फुडेंय जायत रावतलें. आमी अशा ह्या खेळाचो लाव घेवपाक कांयच हरकत ना. पूण एक गजाल खास करून शिकपी भुरग्यां खातीर जेन्ना भुरग्यांच्यो परिक्षा सुरू जातात त्याच काळांत आयपीएल सुरू जाता. तेन्ना कांय दिसां खातीर भुरग्यांनी आयपीएला सावन स्वताक पयस दवरप खूब गरजेचें आसा. कारण आयपीएल आतां वर्सुकी उत्सवा भशेन जालां. आयपीएल सर्त येतली वतली. पूण जिवितांतल्यो त्या त्या फांट्याच्यो परिक्षा ह्यो एकदांच येतात. हाची खास करून दर एका पालकान तशेंच आयच्या शिकपी भुरग्यांनी दखल घेवपाची खूब गरज आसा. कारण आयपीएल आनी आमच्या भुरग्यांच्यो परिक्षा ह्यो चड करून एकाच वेळार जातात. खंयचेय गजालीचो आनंद घेतना स्वताचें लुकसाण जावचें न्हय हाची दरेकल्यान काळजी घेवप खूब गरजेची जावन आसा.
सत्यवान जांगळी
9923697659
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
