भांगरभूंय | प्रतिनिधी
लोकसभेच्या वेंचणुकांक लागून देशांत आयज सगली कडेन प्रचार तेंगशेक पाविल्लो आसतना आयपीएल क्रिकेट सर्तीची
दंगलूय सगली कडेन पळोवंक मेळटा. एके वटेन भाजपाचें ‘अब की बार चारसौं पार’ चो नारो सेगीत कानार पडत आसतना आयपीएलांत खेळपी सगल्याच पंगडांनी दरेक मॅचींत ‘अब की बार दोनशे पार’ चेंच लक्ष्य दोळ्यां मुखार दवरून किमान दोनशें धांवड्यो जावंकूच जाय असोच पवित्रो घेतिल्लो दिसता. धांवड्यांचें टार्गेट सेट करतना किमान दोनशें धांवड्यो केले बगर जैत अशक्य आशिल्ल्याचें पयली बॅटींग करपी पंगडांक दिसूंक लागलां. जाल्यार धांवड्यांचो फाटलाग करपी पंगडूय दोनशे परस चड आशिल्लें टार्गेट लेगीत अशक्य आसा तें शक्य करूंक लागल्यात. आयपीएलच्या ह्या सिजनांत ह्यो मॅची पळयतना आमी हाचो अणभव घेत आसात. ‘सोळावें वर्स घाताचें’ अशें म्हणटात. आयपीएलाचे बाबतींत लेगीत अशेंच म्हणचें पडटलें. अंदूं सोळाव्या वर्सांत पदार्पण करपी ‘आयपीएल’ सर्तूय वयांत आयल्या अशें अंदूं हे सर्तींत जें कितें पळोवंक मेळटा ताचें वेल्यान म्हणूंक येतलें. आयपीएलच्या सुरवातेच्या काळांत 160 ते 170 ही धांवसंख्या हमखास जैत मेळोवन दिवपाक फावोशी आशिल्ली. प्रतिस्पर्धी पंगड हे धांवसंख्ये मेरेन पावता म्हणसर खरस काडटालो. फाटल्या कांय वर्सांत हें टार्गेट 180 ते 185 मेरने पावलें आनी सध्याच्या सिजनांत तर ‘दोनशे पार’ हाचे बगर कोणूच उलोवपाक तयार ना अशेंच चित्र आतां मेरेन दिसून येता. ‘अब की बार चारसौं पार’ नाऱ्याचो असर बी आयपीएलाचेर बी पडिल्लो ना मूं अशेंय फकांडांनी म्हणप जायत आसलें तरी सर्तीचें एकूण स्वरूप कशें बदलत चल्लां हें आतां मेरेनच्या मॅची वेल्यान स्पश्ट दिसून येता.
आयपीएलान वट्ट क्रिकेटीचें स्वरुपच बदलून उडयलां हें वास्तव कोणूच न्हयकारपाचो प्रस्नूच उप्रासचो ना. 260, 250, 240 अश्यो धांवड्यो आतां ‘सेफ’ उरिल्ल्यो नात हाका कितें म्हणप? गुणतक्ट्यांत लागीं लागीं सकयल्या तीन पंगडांनी आशिल्ल्या पंजाब किंग्जान कोलकाता नायट रायडर्साच्या 261 धांवड्यांचो फाटलाग सुमार आठ बॉल राखून करतना जो संवसारीक विक्रम साध्य केलो ताका तर तोडूच ना. एखादे दुसरे मॅचींत अपवादान अशे चमत्कार क्रिकेटींत घडूंक शकतात हें मान्य आसलें तरी अंदूंची ‘आयपीएल’ ताका आडवाद थारल्या आनी चडश्या मॅचींनी ह्या वेळार प्रेक्षकांक दोनशे वयरूच धांवड्यांचें आव्हान दितना वा स्विकारतनाचे चित्र मुखेलपणान दिसलें. थोड्योच कांय मॅची हाका आडवाद थारल्यो. बॅटसमनांनी बॉलरांचेरच शेक दाखयलो अशें चित्र आतां मेरेन अदीं मदीं पळोवंक मेळटालें. पूण ह्या वेळार आंतरराष्ट्रीय पांवड्यार नामना आशिल्ल्या बॉलरां सयत खंयच्याय बॅटसमनांची बॅटींग पळयत जाल्यार तांची सुटका जाल्ली ना ते पळयतकूच नव्या बॉलरांचो ह्या मळार करियर करपाचो आशिल्लो निग्रह कितलो मेरेन तिगून उरतलो होच दुबाव आसा. आतां मेरेन सादारण 10 चौक्यां फाटल्यान एखादो दुसरो सको अशें समिकरण आशिल्लें. पूण अंदूं हें समिकरण बदल्लें आनी चौक्यांचे तुळेन सके चड अश्यो खेळी खूबश्या बॅटसमनांनी ह्या वेळार केल्यो.
क्रिकेटीचें बॅजबॉल खेळांत रुपांतर जावंक लागिल्ल्याचें सॅम करन हांचे सारको क्रिकेट खेळगडो म्हणूंक लागलो जाल्यार बदलत गेल्ल्या झटपट क्रिकेटीचें नवें रूप दाेळ्या मुखार येवचें.
‘इम्पॅक्ट’ खेळगड्याच्या नव्या नेमाक लागूनच हो बदल घडून आयिल्ल्याचें खूबशा जाणांक दिसता आनी ते चुकीचेंय न्हय. क्रिकेट चडांत चड रंगतदार जावची ह्या हेतान ‘इम्पॅक्ट’ खेळगड्याचो नवो नेम अंदूं लागू केला. स बॅटसमन आनी स बॉलरां सयत खेळपाची लॉटरी सगल्याच पंगडांक लागली, पूण ह्या नेमाचो दुरगामी परिणाम झटपट क्रिकेटीचेर कसो जातलो हाचो विचार मात कोणे केल्लो दिसून येना. टी ट्वेंटीची संवसारीक करंड सर्त आतां कांय म्हयन्यांचेर येवन राविल्ली आसतना हो प्रयोग कितलो मेरेन बरो जातलो हें प्रत्यक्ष सर्तीच्या वेळारूच कळून येवपाचो आसलो तरी पंगडांतल्या अश्टताशी खेळगड्यांच्या जिवार हो नेम बेतूंक शकता असो निश्कर्श काडटात. ‘इम्पॅक्ट’ खेळगड्याच्या नेमाक लागून एक बॅटसमन आनी एक बॉलर चड मेळटा आसत जाल्यार अश्टताशी खेळगड्याचेर कित्याक भर दिवचो अशें खंयच्याय पंगडाच्या मुखेल्याक दिसप सहाजिकूच आसा. आतां संवसारीक करंड सर्ती खातीर अश्टताशी खेळगड्याची निवड खंयच्या निकशाचेर निवड समिती करतली हो खरो प्रस्न आसा आनी ताची जाप आयज तरी मेळना. उदाहरणूच दिवपाचें आसल्यार शिवम दुबेचें दिवं येता, आनी आतां मेरेनचे मॅचींत चेन्नयच्या मुखेल्यान ताका बॉलर म्हूण सामकी उणी संद दिली. संवसारीक करंड सर्तींत इम्पॅक्ट खेळगड्याचो नेम आसपाची खंयचीय संद आयचे घडयेक दिसून येना, अशा वेळार हो नेम आयज ह्या पंगडां खातीर बरो थारिल्लो आसलो तरी संवसारीक करंड क्रिकेट सर्तींत खेळटना तो बाबत चड थारूंक शकता हातूंत मात दुबाव ना.
आयपीएलचे अंदूंचे सर्तींतले णव रावंड सोंपले, आनी अजून म्हयनोभर तरी ही सर्त खेळटले. संवसारीक करंड सर्ती खातीर पंगड वेंचतना खूबश्या पोरण्या आनी नव्या खेळगड्यांचे कामगिरीचेर निवड करप्यांचे लक्ष आसतलें हें मान्य आसलें तरी फक्त हेच कामगिरीचेर खंयच्या खेळगड्यांची निवड जावंक शकता? ह्या प्रस्नाची जापूय नकारार्थीच आसतली. अभिषेक शर्मा, शशांक, साई सुदर्शन, आशुतोष शर्मा अशा तीन-चार खेळगड्यांनी निवडकर्त्यांचें आपले कडेन लक्ष ओडून घेतलां. अभिषेक आनी शंशकाची तुफानी बॅटींग घडये सार्थकाकूय लागुये. आपले कडेन गुणवत्ता उणी ना हें खूबशा खेळगड्यांनी दाखोवन दिलां. 35 ते 40 बॉलांनी शेंकडो मारतना बॉलरांक नाकापुरो करपी बॅटसमन ह्या वेळार आमी सगल्यांनीच पळयले. फाटले सर्तींत वट्ट 12 शेंकड्यांची नोंद जाल्ली. तरी अंदूं ही संख्या विसा वयर वचूंक शकता. आतां मेरेन णव ते धा शेंकड्यांची नोंद जाल्या. सके हुबोवपाचे बाबतींतूय तेंच आसा. फाटल्या सिजनांत जंय 1124 सक्यांची नोंद जाल्ली थंय आतांच सुमार हजारा कडेन आंकडो पावला. एखादे मॅचींत सुमार 42 सके पळोवपाची मजाय आमी ह्या वेळार घेतली. आयपीएलांत आतां मेरेन फक्त दोनूच फावटी 250 प्लस धांवड्यो केल्यो. पूण सद्याच्या सिजनांत वट्ट आठ फावटी 250 प्लस धांवड्यांची नोंद जावची हाचें मूळ अर्थांतूच इम्पॅक्टांतूच आसा आनी ‘दोनशे पार’ चो नारो ताका लागूनच दरेक मुखेली दितना दिसता. पांच पांच फावटी ही सर्त जिखपी चेन्नय आनी मुंबय ह्या पंगडां मुखार राजस्थान, केकेआर हांणी नेटाचें आव्हान निर्माण केलां. अंदूं राजस्थाना कडल्यान चमत्कार जावपाची शक्यताय खूबशा जाणांक दिसता. बदलत्या आयपीएल क्रिकेटींतली चुरस अजून तशी सोंपिल्ली ना हेंवूय तितलेंच खरें.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
