भांगरभूंय | प्रतिनिधी
म्हापशें: राज्यांतल्या देवळांचे सुवेवस्थापन आनी देवूळ संस्कृतीचें रक्षण करप ह्या हेतान 10 डिसेंबर दिसा राज्य पांवड्यार मंदीर परिशदेचें आयोजन केलां. ही परिशद म्हाड्डोळा श्रीमहालसा मंदिराच्या सिंहपुरुष सभाघरांत सकाळीं 10 ते सांजवेळा 6.30 ह्या वेळांत जातली अशी म्हायती गोमंतक मंदीर म्हासंघाचे सचीव जयेश थळी हांणी दिली.
काणका हांगा श्रीविश्वाटी विश्वेश्वर देवस्थानाच्या सभाघरांत आयोजीत केल्ले पत्रकार परिशदेक गोमंतक मंदीर म्हासंघाचे अध्यक्ष चंद्रकांत उर्फ भाई पंडीत, श्रीविश्वाटी विश्वेश्वर मंदिराचे अध्यक्ष आनंद पांढरे, श्रीसंग्राम गणेश मंदिराचे अध्यक्ष सत्यवान भिवशेट, हिंदु जनजागृती समितीचे सुशांत दळवी, श्रीशांतादुर्गा देवस्थानचे पदाधिकारी विश्वास पिळर्णकार आनी श्रीविश्वाटी विश्वेश्वर मंदिराचे पदाधिकारी सुदेश किनळेकार हाजीर आशिल्ले.
गोमंतक मंदीर म्हासंघ आनी हिंदू जनजागृती समिती हांणी जोडपणान ही परिशद आयोजीत केल्या. हे परिशदेक बार्देस, पेडणें आनी दिवचलेंतल्या सुमार 150 परस चड मंदिराचे विश्वस्त वांटेकार जातले अशें थळी हांणी सांगलें.
मंदीर परिशदेच्या प्रचाराचे फाटभुंयेर बार्देस, पेडणें आनी दिवचल आनी गोंयच्या सगल्या देवळांच्या विश्वस्तांची भेट घेवन तांकां परिशदेचें आमंत्रण दितात. तशेंच देवस्थानाचे विश्वस्त आनी भक्तगण हांच्यो विवीध सुवातांनी बसकाय जाल्यात. परिशदेंत वांटेकार जावपा विशीं चडशा विश्वस्तांनी सकारात्मक प्रतिसाद दाखयला. देवळांतल्यान धर्म शिक्षणाची वेवस्था जावपा खातीर यत्न करप, देवळांच्या समस्यां कडेन सरकाराचे लक्ष ओडप, देवळांनी वस्त्रसंहिता लागू जावची हे खातीर यत्न करप, देवूळ सरकारी करपाच्या दुश्परिणामा विशीं प्रबोध करप, पुर्तुगेझांनी उद्धवस्त केल्ल्या देवळांच्या पुनर्बांधणे खातीर यत्न करप, ह्या सारक्या विशयांचेर हे परिशदेंत चर्चा जावन ताचेर फुडलें ध्येयधोरण निश्चीत करतले अशी म्हायती जयेश थळी हांणी दिली.
पुर्तुगेझ काळांत गोंयांत देवळांचेर खूबशीं आक्रमणां जालीं. तरी लेगीत पुर्वजांनी हो चैतन्याचो वारसो म्हणल्यार देवळां सांबाळून दवरल्यांत. देवळांचे संवर्धन करप हें दरेकाचे कर्तव्य आसा. देवळांतल्यान धर्म संस्कार आनी धर्माचरण करपा विशीं शिक्षण दिवपाचो विचार जावचो. गोंयच्या देवळांच्या विश्वस्तांनी व्हड संख्येन हे परिशदेंत वांटेकार जावचे अशें आवाहन महासंघाचे अध्यक्ष चंद्रकांत पंडीत हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
