भांगरभूंय | प्रतिनिधी
मुरगांव : ‘गोवा स्पिरिच्युअल फेस्टिवल – संस्कृत दर्शनम्’ ही धर्मीक कार्यावळ आयतारा ९ मार्चाक बायणा दर्यादेगेर सांजेवेळार ४.३० वरांचेर सुरू जातली. आमदार संकल्प आमोणकार हांचे अध्यक्षते खाला उपजिल्लोधिकारी भगवंत करमली, मामलेदार प्रविणजय पंडीत, पुलीस उपअधीक्षक गुरुदास कदम, येरादारी पुलीस निरीक्षक शैलेश नार्वेंकार, पुलीस स्टेशनाचे स्टॅनली गोम्स आनी श्रीदत्त पद्मनाभ पीठ तशेंच सत्गुरू फावंडेशन पदाधिकार्यांचे हजेरेंत बायणा दर्यादेगेर जावपी कार्यावळीची रुपरेशा थारायली.
बायणा दर्यादेगेर ‘गोवा स्पिरिच्युअल फेस्टिवल’ ची ‘समुद्र मंथन’ कार्यावळ सद्गुरू ब्रम्हेशानंदाचार्य स्वामीजींचे हाजेरींत जातली. ह्या वेळार तांचे वांगडा देशांतले स स्वामी हजर रावतले अशें आमदार आमोणकार हांणी सांगलें.
नितळसाणेचे नदरेन दर्यादेगेवेली तयारी दोन ते तीन दिसां पयलीं करतले. पर्यटकांक आकर्शीत करपा खातीर आशिल्लें बोटिंग आनी शॅक्स दनपरां २ वरां उपरांत बंद दवरतले, अशें आमदार आमोणकार हांणी सांगलें.
येवपी भाविकांच्या वाहनांची पार्कींग वेवस्था योग्य तरेन करपाची पुराय जापसालदारकी येरादारी पुलीस घेतले. पुलीस बंदोबस्त आसतलो. ‘समुद्र मंथन पुजा’ जावपाची आशिल्ल्यान जीवरक्षक ती सोंपसर दर्यादेगेर हजर रावतले. ह्या वेळार संत पूजन तशेंच प्रार्थना, सामुहीक भगवद्रीता पठण, दर्या नारायण महाआरती, दर्या मंथन प्रदर्शन आनी महाप्रसादाचें आयोजन केलां, अशेंय तांणी सांगलें.
ह्या वेळार श्रीदत्त पद्मनाभ पीठ तथा सद्गुरू फावंडेशनाचे सुदेश नायक, उमेश फडते, दिलीप काजळे, सुरेंद्र केरकार, जनार्दन पार्सेकार, गुरुप्रसाद बोरकार आनी हेर पदाधिकारी हजर आशिल्ले. ९ मार्चाक दनपरां ४ वरांचेर सगल्यांत पयलीं ब्रम्हेशानंदाचार्य स्वामीजी दामोदर देवाचे दर्शन घेतले उपरांत आमदार कृष्णा साळकार तांकां येवकार दितले. उपरांत ते ‘समुद्र मंथन’ कार्यावळीक वतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
