भांगरभूंय | प्रतिनिधी
भांगरभूंय । सांस्कृतीक प्रतिनिधी
पणजीः पं. योगराज नायक प्रतिश्ठाना वतीन राष्ट्रीय नामनेचो सतारवादक योगराज नायक बोरकार हाचे यादस्तीक इन्स्टिट्यूट मिनेझिस ब्रागांझा (आयएमबी) च्या पालवान आयोजीत करतात ती स्वरयोगी संगीत कार्यावळ आयतार 14 मेक सांजे 4 तें रातयां 8 मेरेन आयएमबी सभाघरांत जातलो.
नामनेचो सतारवादक सहाना बॅनर्जी (पुणे) हाची सतारवादनाची विशेश मैफल ह्या निमतान जातली. तशेंच योगराज हाचो हुबळीचो शिश्य निखील जोशी सतारवादन करतलो. बिरेस्तारा घेतिल्ले एके पत्रकार परिशदेंत प्रतिश्ठानाची अध्यक्ष आनी योगरजा नायकाची भयण तशेंच नामनेची गायिका प्रचला आमोणकार, प्रशांती तळपणकार आनी आयएमबीचो अध्यक्ष दशरथ परब हाणे ही म्हायती दिला. योगराजाची सतारवादक भयण पूनम बुधोळकार ह्या वेळार हाजीर आशिल्लें.
प्रणव च्यारीला शिष्यवृत्ती
फाटले खेप योगराज हाचे सांगितीक जिणेचेर आमी म्हायतीपटाची निर्मणी केल्ली. अदूं सतारवादनाची साधना करपी प्रणव अवधून च्यारी ह्या चल्याक 10 हजार रुपयांची शिश्यवृत्ती मुखेल सोयरो कला आनी संस्कृती मंत्री गोविंद गावडे हाचे हस्तुकीं भेटयतले अशेंं प्रचला आमोणकारान सांगलें. कार्यावळीक मुखेल उलोवपी म्हणून लोककला आनी लोक संस्कृतीचो व्यासंगी अभ्यासक डॉ पांडुरंग फळदेसाय हाजीर रावतले. गोंयांत सतारवादक तयार जावचे म्हणून आमचे यत्न आसलले अशें प्रचलान सांगलें.
योगराज हांचे तन, मन धन म्हणल्यार सतार आशिल्लें. ताच्या शिश्यांनी ताचें दायज फुडें व्हरपाक जाय. सतारीचो झंकार गोंयचे भुयेंतल्यान येत रावपाक जाय, नवोदित कलाकारांनी सतारवादना कडेन येवचें म्हणून उपक्रम चालीक लायतले अशें प्रशांती तळपणकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
