भांगरभूंय | प्रतिनिधी
पणजी: संजना पब्लिकेशन्स आनी गोंय कोंकणी अकादेमीच्या जोड पालवान कवी उदय नरसिंह म्हांबरो हांचो ‘सपनांतल्या गांवची वाट’ हो चौथो कवितांझेलो आयतार 29 सप्टेंबर दिसा सांजवेळा साडेचार वरांचेर प्रकाशीत जातलो. ही कार्यावळ पाटो पणजे दूरसंचार इमारतींत, पांचव्या माळ्यार आशिल्ल्या गोवा कोंकणी अकादेमी सभाघरांत जातली.
उदय म्हांबरो हांचे ‘हय सायबा’, ‘मनशाच्या सोदांत’ आनी ‘इंद्रधोणू उदेवं’ हे तीन कवितांझेले उजवाडा आयल्यात. ‘इंद्रधोणू उदेवं’ ह्या कवितांझेल्याक विश्व कोंकणी केंद्राचो विमला पै पुरस्कार तशेंच गोवा कोंकणी अकादेमीचो उत्कृश्ट कवितांझेलो 2021 चो पुरस्कार फावो जाला. तशेंच तांच्या ‘काळीज उसवलां’ ह्या ललीत निबंध संग्रहाक 2023 वर्साचो कोंकणी भाशा मंडळाचो पुरस्कार फावो जाला.
आयतारा पणजेंत जावपी ह्या कार्यावळीच्या अध्यक्षस्थानार कवी माधव बोरकार आसतले. जाल्यार मुखेल सोयरे म्हूण विद्याप्रबोधिनी म्हाविद्यालयाचे प्राचार्य डॉ. भूषण भावे हाजीर रावतले. गोवा कोंकणी अकादेमीचे अध्यक्ष वसंत सावंत आनी विमला पै पुरस्कार फावो जाल्ले कवी शैलेंद्र मेहता खासा सोयरे म्हूण हाजीर आसतले.
कार्यावळीचें सुत्रसंचालन सुभाष जाण करतले. प्रकाशन सुवाळ्याक वाचकांनी व्हड संख्येन हाजीर रावचें अशें आवाहन संजना पब्लिकेशन्साचे दिनेश मणेरकार हांणी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
