भांगरभूंय | प्रतिनिधी
भांगरभूंय । खबरां मेज
पणजीः गोंयचो पर्यटन आनी म्हायती तंत्रगिन्यान (आयटी) मंत्री रोहन खवंटे हांणी नवी दिल्लींत केंद्रीय म्हायती आनी तंत्रगिन्यान मंत्री आश्विनी कुमार वैष्णव हांची भेट घेवन गोंयांतल्या आयटी उद्देगा विशीं तांचे कडेन भासाभास केली. गोंयांत व्हडा प्रमाणांत आयटी उद्देग आयल्यार गोंयां खातीर तें एक वरदान थारतलें अशें तांणी वैष्णव हांका सांगलें.
खवंटे हांणी गोंयांतल्या आयटी मळाचे उदगती विशीं भासाभास केली. राज्य सरकारन हातांत घेतिल्ले आयटी प्रकल्पांची तशेंच आयटी मळाक उर्बां दिवपा खातीर राज्य सरकारान घातिल्ल्या पावलांची खवंटे हांणी वैष्णव हांका म्हायती दिली गोंयांत आयटी मळार आशिल्ल्यो गुंतवणुकीचो संद आनी ताका लागून तयार जावपी रोजगार हे विशीं दोनूय मंत्र्यांनी खोलायेन चर्चा केली. आयटी उद्देग सुरू करपा खातीर गोंय हें एक आदर्श थळ आसा अशें खवंटे हांणी सांगलें.
आश्विनी कुमार वैष्णव हांणी गोंयांत सुरू आशिल्ल्या आयटी प्रकल्पांची खवंटे हांचे कडल्यान म्हायती घेतली. गोंयांतल्या तीन दर्या वेळानी सुरू केल्ल्या वर्केशन गोवा ह्या उपक्रमाची म्हायती खवंटे हांणी वैष्णव हांका दिली. गोंयांत आयटी उद्देगांतले गुंतवणुकेक उर्बां दिवपा खातीर केंद्रीय आयटी मंत्रालया वतीन यत्न करपाचें उतर वैष्णव हांणी आपल्याक दिलां अशें खवंटे हांणी बसके उपरांत पत्रकारांक सांगलें. गोंय हे आयटी हब करपा खातीर गांवगिऱ्या वाठारांत लेगीत कनेक्टिव्हिटीचो प्रश्न सुटावो करतले अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
