भांगरभूंय | प्रतिनिधी
2023-24 अर्थीक वर्सा खातीर 7 कोटी वयर आयटीआर दाखल
नवी दिल्ली, खबरां संस्था ः आयटीआर फायल करपाची मुजत सोंपली. 2023-24 अर्थीक वर्सा खातीर आतां मेरेन 7 कोटी वयर आयटीआर दाखल केल्यात. निमाण्या दिसा म्हणल्यार 31 जुलय 2024 दिसा सांजवेळा 7 मेरेन 50 लाखां परस चड आयटीआर फायल केल्यात.
आयटीआर फायल करूंक नाशिल्ल्यांक आतां आयटीआर फायल करपा खातीर फी भरची पडटली. वैयक्तीक करदात्याचें वर्सुकी उत्पन्न 5 लाखां परस चड आसल्यार 5 हजार रुपया शुल्क. जाल्यार येणावळ 5 लाखां परस उणी आसल्यार एक हजार रुपया फी वसूल करतले.
आयटीआर फायल करपा खातीर पोरणें आनी नवें दोन प्रकारचे नेम
० करदात्यांक आयटीआर फायल करपाक दोन पर्याय आसात. तुमी पयली वा पोरणी कर पद्दत निवडली जाल्यार, फकत 2.5 लाख रुपया मेरेनचे उत्पन्न कर मुक्त आसतले. पूण आयकर कायद्याच्या कलम 87A खाला 5 लाख रुपया मेरेनच्या उत्पन्नाचेर कर वाचवंक मेळटा.
० नवी कर पद्दत निवडल्या उपरांत तुमकां 3 लाख रुपया मेरेन उत्पन्नाचेर कर भरचो पडचो ना. हातूंत येणावळ कर कायद्याच्या कलम 87A खाला पगारदार व्यक्तींक 7.5 लाख रुपया मेरेन उत्पन्नाचेर कर सुट मेळूं येता आनी हेरांक 7 लाख रुपया मेरेन उत्पन्नाचेर कर सुट मेळूं येता.
आयटीआर फायल भरपाची प्रक्रिया
१. आयटीआर फायल करपाक पयलीं आयकर खात्याच्या https://eportal.incometax.gov.in/iec/foservices/#/login ह्या अधिकृत सायटीचेर वचात.
२. User ID भरात आनी मागीर Continue हाचेर क्लिक करात. तुमचो पासवर्ड घालात आनी लॉगीन करात. पासवर्ड याद ना जाल्यार Forgot Password वरवीं नवो पासवर्ड तयार करूंक शकतात.
३. लॉगीन केल्या उपरांत एक पान उगडटलें, थंय ई-फायलाचेर क्लिक करतात. आयकर रिटर्न फायल करात हो पर्याय निवडात. मूल्यांकन वर्स 2023-24 निवडात आनी फुडें वचात.
४. तुमकां ऑनलायन आनी ऑफलायन पर्याय मेळटलो. हातूंत तुमी ऑनलायन निवडटात. आतां तुमच्या वर्गा प्रमाण ITR-1 वा ITR-4 कडल्यान पर्याय निवडात आनी फुडें वचात.
५. तुमी पगारदार कर्मचारी आसल्यार ITR-1 निवडात. फॉर्म तुमच्या सिस्टमाचेर डाउनलोड जातलो. मागीर ‘Filling Type’ हातूंत वचून 139(1)- Original Return निवडात.
६. अशे तरेन तुमचो रिटर्न मिनटां भितर दाखल जातलो आनी मागीर तुमी तुमच्या रिटर्नाची खात्री करपा खातीर ई-व्हेरिफिकेशन करूंक शकतात.
आयटीआर व्हेरिफिकेशन गरजेचें, नाजाल्यार आयटीआर अवैध
आयकर रिटर्न सादर केल्या उपरांत व्हेरिफिकेशन करप म्हत्वाचें. जर व्हेरिफिकेशन करुंक ना जाल्यार दाखल केल्लो आयटीआर कायदेशीर मानूंक मेळना आनी खातें ताचेर प्रक्रिया करची ना. आयकर खातें आयटीआर व्हेरिफिकेशन करपा खातीर 5 पर्याय दिता. नेट बँकिंग, बँक एटीएम, आधार ओटीपी, बँक खातें आनी डीमॅट खातें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
