भांगरभूंय | प्रतिनिधी
सभापती रमेश तवडकारः संकल्प येवजणे खाला काणकोणां मार्गदर्शन शिबिराचें आयोजन
भांगरभूंय । प्रतिनिधी
काणकोणः कुशळ कामगार दिवपाची जापसालदारकी काणकोण आयटीआयन घेवची. ते खातीर सरकारा कडल्यान जाय तो आदार दितले, अशें उतर सभापती रमेश तवडकार हांणी दिलें. आयटीआयंत प्रशिक्षण पुरय करपी तरणाट्यांक पर्यटन मळाचेर खूबशो संदी आसात. तांचो तांणी लाव घेवचो, असोय तांणी उलो मारलो.
राज्य कुशळटाय विकास संचालनालया वतीन आमोणेंच्या आदर्श ग्रामांतल्या संस्कृती भवनांत संकल्प येवजणे खाला काणकोणच्या आयटीआय केंद्रान मार्गदर्शन शिबिराचें आयोजन केल्लें. दिवली पेटोवन शिबिराचें उक्तावण केले उपरांत सभापती तवडकार उलयताले.
हें शिबीर आदिवासी आनी अनुसुचीत जाती जमातींतल्या विद्यार्थ्यां खातीर आयोजीत केल्लें. ह्या सुवाळ्यांक पैंगीणची सरपंच सविता तवडकार, कुशळटाय विकास संचालनालयाचे संचालक दीपक देसाय, सहाय्यक संचालक राजेश लोलयेंकार, काणकोण आयटीआयचे प्राचार्य सम्राट ना. गांवकार, मडगांव आयटीआय केंद्राचे प्राचार्य रमेश वेळीप हाजीर आशिल्ले.
आपले निवासी शाळेंत वीज, नळाचे दुरुस्ती खातीर गरजेचे कुशळ कामगार मेळनात. हेर राज्यांतले कामगार हीं कामां करतात. ही सुवात थळाव्या कुशळ कामगारांनी भरून काडची, अशें सविता तवडकार हांणी सांगलें.
दीसभर चलिल्ले हे कार्याशाळेंत आयटीआयंतल्यान जे विवीध तरेचें शिक्षण दितात, तांचो काळ, शिक्षणीक पात्रताय, सरकारा कडल्यान चड करून आदिवासी समाजांतल्या भुरग्यां खातीर दितात त्यो सरकारी सवलती, शिक्षणा उपरांत मेळपी रोजगाराच्यो संदी हे विशींचें उत्कृश्ट अशें मार्गदर्शन संचालक दीपक देसाय, सहाय्यक संचालक राजेश लोलयेंकार हांणी केलें.
अंदूं 2022-23 शिक्षणीक वर्सांत काणकोण आयटीआयंत ज्या 226 विद्यार्थ्यांनी प्रवेश घेतला, तातूंतले 105 विद्यार्थी गांवडोंगरी, खोतीगांव वाठारांतल्या आदिवासी समाजांतले आसात. हे आदीं खंयच शिक्षणा खातीर प्रवेश मेळूंक ना, हे खातीर निमाणो उपाय म्हूण आयटीआयक पसंती दितात. तातूंत आतां बदल जाला. काणकोण म्हालांतल्यान आयटीआयक प्राधान्य मेळपाक लागलां, अशें प्राचार्य सम्राट गांवकार हांणी येवकाराच्या उलोवपांत सांगलें. तांणीच प्रास्तावीक केलें.
रीमा वेळीप, निशा नाटेकार, गौरी धुरी, प्रियांका नायक हांणी सोयऱ्यांक फुलां तुरे भेटयले. आयटीआयंत जे शिक्षण घेतात त्या सगळ्याक खास कीट भेटयलो. ह्या वेळार प्रातिनिधीक स्वरुपांत राजेश गांवकार, अक्षय गांवकार हांकां सभापती हस्तुकीं हे कीट भेटयले. तशेंच आयटीआयंत शिक्षण घेतले उपरांत स्वताचो वेवसाय सुरू केल्ल्या बायलांक ह्या वेळार सविता तवडकार हांचे हस्तुकीं प्रशस्तीपत्रकां भेटयलीं. इन्स्ट्रक्टर स्ट्रेसी आनी डिस्कोन डिकॉस्टा हांणी सुत्रसंचालन केलें. इन्स्ट्रक्टर पूर्णानंद दलाल हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
