भांगरभूंय | प्रतिनिधी
पणजी : आयटीआयच्या विद्यार्थ्यांक धावी वा बारावेच्या समांतर दर्जाची शिक्षणीक पात्रताय दिवपा विशीं विचार सुरू आशिल्ल्याचें मुख्यमंत्री डॉ. प्रमोद सावंत हांणी सांगलें. बिरेस्तारा पणजे, दिवचले, फार्मागुढी, वास्को, काकोडा आनी म्हापश्यां उबारपी सेंटर ऑफ एक्सलंसाच्या व्हर्च्युअल बुन्यादी फातर बसोवपाच्या सोहळ्यांत ते मुख्यमंत्री उलयताले. ह्या वेळार शिक्षण सचीव प्रसाद लोलयेंकार, संचालक एस एस गांवकार आनी हेर अधिकारी हजर आशिल्ले.
आठवी आनी धावी पास आशिल्ल्या विद्यार्थ्यांनी एका वर्साचो आयटीआय अभ्यासक्रम पुराय करचो. ताची शिक्षणीक पात्रताय धावेच्या समांतर दर्जाची समजतले. हाचे खातीर शिक्षण खात्या कडल्यान बेगीनूच आदेश काडटले. सरकारी कार्यालयांत एमटीएस पदां खातीर धावी पास जावप गरजेचें आसता. नवे नेम आयले काय धावेंत नापास जाल्ले, मात आयटीआय जाल्ले विद्यार्थीय सरकारी खात्यांत एमटीएस पदां खातीर अर्ज करपाक शकतले, अशेंय मुख्यमंत्र्यान मुखार सांगलें.
तशेंच धावी पास जाल्ल्या विद्यार्थ्यान दोन वर्सांचो आयटीआय अभ्यासक्रम पुराय केल्यार ताची शिक्षणीक पात्रताय बारावेच्या समान दर्जाची गृहीत धरतले. त्या विद्यार्थ्याक सध्याच्या नेमां प्रमाण शालान्त मंडळाच्या दोन भाशेच्या विशयांची परीक्षा दिवची पडची ना. तो विद्यार्थी बारावी पास आसा अशे समजतले. हाचे खातीर अभ्यासक्रमांत कांय बदल करचो पडटलो ह्या विद्यार्थ्यांक बीए वा बीकॉमा खातीरूय प्रवेश घेवपाक मेळटलो. फुडल्या वर्सा सावन हाची अंमलबजावणी जातली.
आदीं कांयच जमनासलें वा नापास जाल्यार आयटीआय करपाचो सल्लो दिताले. आमी ही मानसिकताय बदल्ल्या. सरकारान आयटीआयतल्यान कुशळ उदरगत उपक्रम सुरू केल्यात. गोंयच्या सगळ्या आयटीआयंक आयएसओ नामांकन मेळ्ळां. आयज बुन्यादीफातर बसयिल्लें सेंटर ऑफ एक्सलंसाक लागून विद्यार्थ्यांक आनीक बर्यो सुविधायो उपलब्ध जातल्यो. हाका लागून टाटा टेक्नॉलॉजीन १६५ कोटी, जाल्यार गोंय सरकारान सुमार ३५ कोटी रुपया खर्च केल्ल्याचें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.