भांगरभूंय | प्रतिनिधी
पणजी : कौशल्य विकास खात्या वतीन राज्यांतल्या विवीध आयटीआयंत गेस्ट लेक्चरर म्हणून व्होकेशनल इंस्ट्रक्टराच्या ९ सुवातांचेर भरती करतले. हातुंतल्या ८ सुवातांचेर भरती जून २०२६ मेरेन आसतली. गरजे प्रमाण पदांचे दर वर्सा नुतनीकरण करतले. सगल्या पदां खातीर सरळ मुलाखत १५ सप्टेंबराक श्रमशक्ती भवन हांगा सकाळीं १०.३० वरांचेर जातली. उमेदवारांनी एका वरां पयलीं नोंदणी करप गरजेचें.
हातूंत इलेक्ट्रिशियन, फूड अँड ब्रेव्हरेज, हाऊसकीपर, इलेक्ट्रोनिक्स मेकानीक, इलॅक्ट्रीक मोटार व्हेईकल, घनकोयर वेवस्थापन, वायरमन, मल्टी मिडिया निमेशन, वायरमन (सर्व थिअरी) तशेंच शिवणकाम तंत्रज्ञान ( प्रॅक्टिकल) या ट्रेड खातीर व्होकेशनल इंस्ट्रक्टरची दरेकी एका पदाची भरती करतले. शिवणकाम तंत्रज्ञान पदाची भरती १७ डिसेंबर २०२५ मेरेन आसतली. वयल्या पदां खातीर तासिका तत्त्वाचेर वेतन दितले.
हे खातीर मान्यताय मेळिल्लें अभियांत्रिकी महाविद्यालय, विद्यापीठ हांचे कडल्यान बॅचलर ऑफ व्होकेशनल वा समतुल्य पद्वी आसप गरजेचें. उमेदवारांक संबंदीत मळार एक ते तीन वर्सांचो अणभव आसपाक जाय. वा तीन वर्सांचो डिप्लोमा वा डीजीटी हांचे कडल्या संबंदीत ऍडव्हान्सड् डिप्लोमा (व्होकेशनल) गरजेचो. हे विशीं चड म्हायती, म्हायती खात्याचे वेबसायटीचेर आसा.
आयसीएआरांत ४ सुवातांचेर भरती
पोरणें गोंयच्या केंद्रीय दर्यादेग कृषी संशोधन संस्थेंत (आयसीएआर) विवीध प्रकल्पां खातीर मदतनीस (यंग प्रोफेशनल) म्हणून ४ सुवातांचेर भरती करतले. हातूंतल्या दोन सुवातां खातीर अर्ज करपाची निमाणी तारीख २२ सप्टेंबर आसा. जाल्यार हेर दोन पदां खातीर २४ सप्टेंबराक सरळ मुलाखती जातल्यो. हे खातीर म्हयन्याळें ३० हजार रुपया वेतन दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
