भांगरभूंय | प्रतिनिधी
नवी दिल्ली, खबरां संस्था : गोंयांत पावसान मात्सो सुशेग घेतला आसलो तरी हेर २७ राज्यांनी हवामान खात्यान आयज शुक्रार ते २० आॅगस्ट मेरेन खस करून रातचो घोग्यांनी पावस पडपाची शिटकावणी दिल्या. राजस्थानांत जयपूर आनी जोधपुरा सयत १९ जिल्ह्यांनी उटंगराचो पावस पडटलो. काल बिरेस्तारा हांगा घोग्यांनी पावस पडलो. जयपुरांत फाटल्या २४ वरांनी १५० मिमी पावस झडलो.
देशाच्या ईशान्य वाठारांत फुडले दोन दीस उटंगाराच्या पावसाची शक्यताय आसा. फाटलें सप्तकभर ईशान्य राज्यांनी पावसा कडेन संबंदीत घडणुकांनी २२ जाणांक मरण आयलां. जम्मू- काश्मीरांत ३ जिल्ह्यांनी बिरेस्तारा ढगफुटी जाली. ताका लागून खुबश्या वाठारांनी उदक सांठून उरिल्लें. एकल्याक मरण आयलें.
दिल्लीक पावस उणो जाला. कमाल तापमान ३४ अंश सेल्सियस नोंद जालें. पंजाबच्या पठाणकोटांत १६ मिमी, तर हरियाणाच्या रोहतकांत २१ मिमी पावसाची नोंद जाली.
हिमाचलांत १२६ रस्ते बंद
हिमाचल प्रदेशांत उटंगाराचो पावस चालू आसा. हवामान खात्यान २१ ऑगस्ट मेरेन राज्यांत पावसाचो ऑरेंज अलर्ट जारी केला. हुंवार आनी पालसणां कोसळिल्ल्यान १२६ रस्ते बंद आसात. हातूंत दोन राष्ट्रीय महामार्गांचोय आसपाव आसा.
कांगडा, सिरमौर आनी बिलासपूर जिल्ह्यात बुधवार- बिरेस्तारा रातीं नेटाचो पावस जालो. ताका लागून कांगडांत कांय न्हंयांक हुंवार आयला. कांगडा १५६ मिमी पावसाची नोंद जाली. धर्मशाला शारांत १५०.८ मिमी पावसाची नोंद जाली. अधिकार्यांनी दिल्ल्या म्हायती प्रमाण, २७ जून ते १४ ऑगस्ट मजगतीं पावसा कडेन संबंदीत घडणुकांनी ११३ लोकांक मरण आयलां.
केरळांतल्या कोझिकोड आनी वायनाड जिल्ह्यांत पावसाचो ऑरेंज अलर्ट जारी केला. १२ जिल्ह्यांनी येलो अलर्ट जारी केला. आयज १६ ते १९ ऑगस्ट मजगतीं राज्यांत उटंगाराच्या पावसाची शक्यताय आसा. ह्या काळांत नुस्तेंमार्यांक दर्या पसून पयस रावपाक सांगलां.
फाल्यां १८ राज्यांनी उटंगार
हवामान विभागान दिल्ले म्हायती प्रमाण, १७ ऑगस्टाक राजस्थान, जम्मू-काश्मीर, उत्तराखंड, उत्तर प्रदेश, हिमाचल प्रदेश, छत्तीसगड, पश्चिम बंगाल, बिहार, नागालँड, मणिपूर, मिझोराम, त्रिपुरा, झारखंड, ओडिशा, तामिळनाडूंत पावस झडटलो. केरळ, लक्षद्वीप, कर्नाटकांत घोग्यांनी पावसाची शक्यताय उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
