भांगरभूंय | प्रतिनिधी
जीएमआर : सॅक्युरिटी क्लियरन्स करूंक नाशिल्ल्याचें रजांव
भांगरभूंय । प्रतिनिधी
पेडणें : मोपा आंतरराष्ट्रीय विमानतळाचेर थळावे टॅक्सी वेवसायीक ब्ल्यू कॅप कावंटर संघटणेन सॅक्युरिटी क्लियरन्स करूंक नाशिल्ल्यान जीएमआर कंपनीन 15 एप्रील सावन ब्ल्यू कॅप टॅक्सी कावंटर बंद करपाची नोटीस संघटणेक धाडल्या. ताची प्रत मोपा पुलीस स्टेशनाक धाडून कायदो सुवेवस्था इबाडली जाल्यार तातूंत लक्ष घालपाची विनवणी केल्या.
थळाव्या भुंयपुतांक टॅक्सी वेवसायीक हांकां मोपा विमानतळाचेर हक्काची सुवात, हक्काचो टॅक्सी कावंटर मेळचो हे खातीर वर्सभर आंदोलन केलें. सरकाराक निवेदन सादर केलें. स म्हयन्यां आदीं ब्ल्यू कॅप टॅक्सी कावंटर मोपा विमानतळाचेर दिल्लो. पूण सॅक्युरिटी क्लियरन्स करूंक नाशिल्ल्यान हो टॅक्सी कावंटर 15 एप्रील सावन बंद करचो, अशी नोटीस संघटणेक धाडल्या.
हे संबंदांत संघटणे कडेन संपर्क केलो, तेन्ना तांणी संगलें, आमी चर्चा सुरू केल्या. सगळ्या टॅक्सी वेवसायिकां कडेन हो विशय पावयला. हाचेर उपाय काडचे खातीर सगळे पदाधिकारी फुडलो निर्णय घेतले. आमी वेळार थंय डिपोझीट दितात, अशें वेवसायिकांनी म्हणलां. मजगतीं, 1 एप्रील सावन गोंय पर्यटन उदरगत म्हामंडळाचो टॅक्सी कावंटर बंद जाल्लो. ते उपरांत मांद्रेंचे आमदार जीत आरोलकार हांचे कडेन टॅक्सी वेवसायिकांनी भेट घेवन चर्चा केली. आमदार आरोलकार हांणी मुख्यमंत्री डॉ. प्रमोद सावंत, पर्यटन मंत्री रोहन खंवटे हांचे कडेन चर्चा करून उपाय काडलो. ते उपरांत तो कावंटर सुरू जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
