भांगरभूंय | प्रतिनिधी
पणजी: शालान्त मंडळा वतीन यत्ता धावेची परिक्षा आयज शुक्रारा 13 मार्च सावन सुरू जाता. गोंयांत वट्ट 37 केंद्रांनी मेळून 20659 विद्यार्थी पयलेच खेपे परिक्षेक बसतले. अंदूं विद्यार्थिंनी (चलयो) परस विद्यार्थ्यांचो (भुरगे) आंकडो चड आसा. हालींच्या वर्सांनी भुरग्यां परस चलयांचो आंकडो चड आसतालो. आयज पयले दिसा इंग्लीश पेपर जातलो. फाटल्या वर्सा (2025) वट्ट 18874 विद्यार्थ्यांची नोंद जाल्ली. फाटल्या वर्सा परस अंदूं 1785 विद्यार्थी चड आसात.
अंदूं परिक्षे खातीर 10765 भुरगे जाल्यार 9894 चलयांची परिक्षे खातीर नोंद जाल्या. परिक्षा 27 मार्च मेरेन चलतली. 27 मार्चा उपरांत एनएसक्यूएफ विशयांचे पेपर जातले. दर दिसा सकाळीं 9.30 ते 12.30 ह्या वेळांत पेपर जातले.
अंदूं कांय विशय घेवन 108 भुरगे आनी 96 चलयो मिळून 204 विद्यार्थी परिक्षेक बसतले. सगले विशय घेवन परिक्षेक बसपी खासगी विद्यार्थ्यांचो आंकडो 813 आसा. हातूंत 557 भुरगे जाल्यार 256 चलयांचो आस्पाव आसा. कांय विशय घेवन 104 खासगी विद्यार्थ्यांनी परिक्षे खातीर नोंदणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
