भांगरभूंय | प्रतिनिधी
गाडयांच्या वेळांत एक ते दोन वरांचो बदल
मडगांव, प्रतिनिधी ः कोंकण रेल्वे मार्गाचेर आयज सावन गीमाळ्याचे वेळापत्रक चालीक लायला. पावसाच्या हंगामात उणी केल्ली रेल्वेची गती आतां वाडटली. गिमाळ्याचे वेळापत्रका प्रमाण स्टेशनाचेर येवपी आनी वचपी गाडयांच्या वेळांत एक ते दोन वरांचो बदल जातलो.
कोंकण रेल्वे मार्गाचेर रेल्वे वेळापत्रक पावसाळी आनी गिमाळे अशें दोन टप्प्यांनी चलता. पयल्या टप्प्यांत 1 नोव्हेंबर ते 9 जून मेरेन गिमाळ्या हंगामाचें वेळापत्रक चालीक लायतात. जाल्यार पावसाच्या हंगामात गाडयांची गती उणी जाता आनी 10 जून ते 31 ऑक्टोबर ह्या काळांत गाडयांची गती थारायतात. गिमाळ्या वेळापत्रका प्रमाण गाडयांचो वेग वराक 130 ते 160 किमी आसतलो. हाका लागून वेगान चलपी वंदे भारत एक्सप्रेस फकत 7 वरां 45 मिनटांनी मुंबयच्यान मडगांवांत पावतली. जाल्यार तेजस एक्सप्रेस 9 वरां आनी 10 मिनटांनी मडगांव पावतली. जनशताब्दी एक्सप्रेस मुंबयच्यान 9 वरां आनी 20 मिनटांनी मडगांव पावतली.
कोंकण कन्या एक्सप्रेस मडगांव सावन सांजवेळा 7 वरांचेर सुटून सकाळीं 8.38 वरांचेर सावंतवाडी, सकाळीं 9 वरांचेर कुडाळ, सकाळीं 9.14 वरांचेर सिंधुदुर्गनगरी, सकाळीं 9.30 वरांचेर कणकवली आनी सकाळीं 9.56 वरांचेर वैभववाडीतल्या सुटून सकाळीं 5.40 वरांचेर मुंबय सीएसटीचेर पावतली. जनशताब्दी एक्सप्रेस मडगांव सावन दनपारां 3.05 वरांचेर सुटून सावंतवाडी 4.24 वरांचेर, कुडाळ 4.42 वरांचेर, कणकवली 5.04 वरांचेर पावतली. वंदे भारत एक्सप्रेस मडगांव सावन दनपारां 2.40 वरांचेर सुटतली आनी सांजवेळार 4.20 वरांचेर कणकवली पावतली. मांडवी एक्सप्रेस सकाळीं 9.15 वरांचेर मडगांवांतल्यान सुटतली आनी 10.42 वरांचेर सावंतवाडी, 11.4 वरांचेर कुडाळ, 11.17 वरांचेर सिंधुदुर्ग नगरी, 11.32 वरांचेर कणकवली आनी 11.58 वरांचेर वैभववाडी पावतली.
दिवाळेच्या सुटयेत व्हड प्रमाणांत पर्यटक गोंयांत येतात. तशेंच उपरांत नाताळ आनी डिसेंबरात पर्यटकांचो आंकडो बरोच वाडटा. ते खातीर कोंकण रेल्वेच्या बदलिल्ल्या वेळापत्रका विशीं म्हायती घेवन प्रवास करपाचो उलो रेल्वे प्रशासनान केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
