भांगरभूंय | प्रतिनिधी
भारता सयत संवसारांतली लोकसंख्या नेटान वाडत आसा. सदांच वाडत वचपी लोकसंख्या कांय गजालींनी फायद्याची आनी कांय गजालींनी माल पडटा. संवसारभर दर वर्सा ११ जुलयाक संवसारीक लोकसंख्या दीस मनयतात. संवसारीक लोकसंख्या दीस कसो सुरू जालो? हाचो हेतू कितें? हे विशीं जाणून घेवया.
…म्हणून लोकसंख्या दीस मनयतात
दर वर्सा ११ जुलय हो दीस संवसारीक लोकसंख्या दीस म्हूण मनयतात. हो दीस मनोवपाचो फुडाकार डॉ. के. सी.जकेरिया हांणी घेतिल्लो. सदांच वाडत वचपी लोकसंख्या कांय गजालींनी फायद्याची आनी कांय गजालींनी लुकसाणाचीय आसता. वाडपी लोकसंख्येचो धोको आनी फायदो लोकांक जाणून घेवपाच्या हेतान हो दीस मनयतात. ह्या दिसा विवीध कार्यावळी आनी संदेशा वरवीं लोकांचे लक्ष वाडपी लोकसंख्ये कडेन ओडटा.
दिसाची सुरवात कशी जाली?
१९८९ वर्सा संयुक्त राश्ट्रांनी संवसारीक लोकसंख्या दीस मनोवपाची घोशणा केली. १९८७ वर्सा ह्या दिसा संवसारांतली लोकसंख्या ५ अब्ज पार जाली तेन्ना हो दीस मनोवपाची कल्पना जल्माक आयली. हो दीस मनोवपाची सुचोवणी डॉ. जकेरिया हांणी केली. संवसारीक लोकसंख्या दीस १९८९ वर्सा संयुक्त राश्ट्रांच्या उदरगत कार्यावळीन (UNDP) स्थापन केलो. पयलो लोकसंख्या दीस ११ जुलय १९९० दिसा मनयलो.
दीस मनोवपाचो हेतू
सद्या संवसारांतली लोकसंख्या ८ अब्ज परस चड आसा. ह्या दिसा वाडत वचपी लोकसंख्येच्या विकास आनी पर्यावरणीय प्रस्नांचेर भर दितात. लोकसंख्येची वाड सकारात्मक परिणामां परस चड वायट परिणाम जातात अशें दिसता, जाचे विशीं लोक सांगपाचो यत्न करतात. ह्या दिसा लोकांक लैंगीक समानताय, प्रजनन भलायकी आनी कुटुंब नियोजन हाचें म्हत्व सांगतात.
२०२४ चो विशय
संवसारीक लोकसंख्या दिसा २०२४ चो विशय ‘सगले मेजतात’ असो आसा. संवसारभरांतल्या लोकांक गरजेच्यो सेवा दिवपा खातीर लोकसंख्येचो डेटा एकठांय करपाचें म्हत्व हो विशय उजवाडाक हाडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
