आयज विर्डी सांखळे बाल किर्तन महोत्सव

भांगरभूंय | प्रतिनिधी

रवींद्र भवन सांखळे वतीन आयोजन

दिवचल: रवींद्र भवन सांखळे वतीन विर्डी सांखळे ‘ज्ञानदीप लावू जागी’ ह्या बाल युवा किर्तन महोत्सवाचें आयोजन केलां. आयज (शेनवार) दनपारां 3 वरां सावन विर्डीच्या श्रीमहादेव देवस्थानाच्या माटवांत हो किर्तन महोत्सव जातलो. हातूंत बाल किर्तनकार आपलें किर्तन सादर करतले अशी म्हायती रवींद्र भवनांत घेतिल्ले पत्रकार परिशदेंत दिली.

सांखळी ही देवदेवतांचीं भूंय आसा. हे नगरीत अध्यात्मीक सुवाळे सुरूच आसतात. व्हड संख्येन भावीक अध्यात्मीक पांवड्यार जावपी सुवाळ्यांत हाजेरी लावन दादूय दितात. तेच फाटभुंयेर रवींद्र भवन सांखळे वतीन बाल आनी युवा किर्तनकारांचे कलेक उर्बा मेळची हे खातीर बाल युवा किर्तन महोत्सवाचें आयोजन विर्डी गांवांत केलां, अशी म्हायती रवींद्र भवनाचे संचालक श्रीरंग सावळ हांणी दिली.

पत्रकार परिशदेक रवींद्र भवनाचे उपाध्यक्ष दत्ताराम चिमुलकार, संचालक श्रीरंग सावळ, दिनकर घाडी, स्नेहा देसाय, रविराज च्यारी तशेंच कार्यावळ अधिकारी लक्षराज अमोणकार, कला विभागाचे श्रीनेश हिंदे आनी जेस लुईस हाजीर आशिल्ले.

ह्या किर्तन महोत्सवांत ह.भ.प. शिवानी सुहास वझे, ह.भ.प. नेहा अभय उपाध्ये, ह.भ.प पवन अभय खोत, ह.भ.प. विष्णू फटी गांवस, ह.भ.प. स्वतेजा कुंभार, ह.भ.प. श्रेया इंगळे, ह.भ.प. शारदा आरोंदकार, ह.भ.प. आशना भगत हे कलाकार किर्तन कला सादर करतले.

तांकां तबल्याचेर रुद्राक्ष वझे, पुष्पशील मळीक, ऑर्गनाचेर डॉ. सुबोध कांसार, गोपाळ प्रभू, चिपळी दामोदर कामत, देवानंद सुर्लकार, पखवाजाचेर गौरव गांवस साथसंगत करतले.

कार्यावळीचें सुत्रसंचालन किर्तन म्हाविद्यालयाचे प्राचार्य ह.भ.प. सुहास वझे करतले अशी म्हायती ह्या वेळार दिली.

रवींद्र भवन सांखळी हें गांवगिऱ्या वाठारांत पावचें आनी रवींद्र भवना वतीन गांवगिऱ्या वाठारांत कार्यावळी सादर करून चडांत चड लोकांचो सहभाग तातूंत जावचो हे खातीर विवीध कार्यावळी सांखळी मतदारसंघांतल्या विवीध गांवांनी आयोजीत करतात. हे संकल्पनेंतल्यान बाल किर्तन बाल युवा किर्तन महोत्सव विर्डी गांवांत आयोजीत केला अशें ह्या वेळार रवींद्र भवनाचे उपाध्यक्ष दत्ताराम चिमुलकार हांणी सांगलें.

ह्या महोत्सवाक व्हड संख्येन लोकांनी हाजीर रावचें अशें आव्हान ह्या वेळार केलें.