भांगरभूंय | प्रतिनिधी
न्यायालयाच्या आदेशा प्रमाण 25 घरांचेर जातली कारवाय
म्हापशें: थिवी कोमुनिदादीचे सुवातेंत बेकायदो रितीन बांदिल्लीं माडेलांतलीं लाला की बस्तींतलीं 24 घरां आयज (मंगळारा) मोडटले. फाटल्या 12 मार्च दिसा ही बेकायदो घरां बुलडोझरान मातयेभरवण करपाची कारवाय ऐनवेळार मुखार धुकलिल्ली.
कोमुनिदाद सुवातेंत बेकायदो उबारिल्ल्या सुमार 25 घरांक फेब्रुवारी म्हयन्याच्या निमाण्या सप्तकांत उत्तर गोंय कोमुनिदाद प्रशासक पांडुरंग गाड हांणी नोटीस दिवन घरां मोडपाचे निदेश दिल्ले.
तशेंच स्वता बांदकाम मोडून सुवात पयली आशिल्ली तशी हाडपा खातीर 15 दिसांची मुजत दिल्ली. दिल्ले मुजतींत कोमुनिदादीचे सुवातेंत बांदिल्लीं घरां मोडलीं नात, जाल्यार तीं मोडटले अशी शिटकावणी प्रशासकांनी आदेशांत दिल्ली. ही मुजत 11 मार्च दिसा सोंपिल्ली.
पूण उपरांत ऐनवेळार ही कारवाय थांबयिल्ली. आतां ही कारवाय आयज सकाळीं पुलीस बंदोबस्तांत हातांत घेतले आनी अतिक्रमण हटाव पंगडा सयत सगल्या सरकारी यंत्रणांक घडणूक थळार हाजीर रावपाचे निदेश दिल्यात.
मजगतीं, थिवी कोमुनिदादीचे जमनीचेर व्हड प्रमाणांत अतिक्रमण करून हीं घरां बांदतल्यांत. हे खातीर संबंदीत अधिकाऱ्यां कडल्यान परवानगी घेतिल्ली ना. ह्या अतिक्रमण करून जाल्ले वसणुकेक लाला की बस्ती म्हूण वळखतात. पयलीं थिये कांय स्थलांतरीत रावताले. त्या वेळार राजकी आशिर्वादाक लागून कोमुनिदाद सुवातेर अतिक्रमण करून हीं बांदकामां उबीं राविल्लीं.
हें अतिक्रमण थांबोवपा खातीर थिवी कोमुनिदाद वेवस्थापन समितीन न्यायालयांत धांव घेतिल्ली. कनिश्ठ न्यायालयान हीं बांदकामां मोडून उडोवपाचो आदेश दिल्लो. ह्या आदेशाक संबंदितांनी उच्च न्यायालयांत आव्हान दिल्लें. पूण फाटल्या 2023 वर्सा ही याचिका भायरायिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
