आयज मेळटलो नवो चॅम्पीयन

भांगरभूंय | प्रतिनिधी

रॉयल चॅलेंजर्स बंगळुरू आनी पंजाब किंग्स ह्या पंगडां मदीं आयज इंडियन प्रिमियर लिगेची फायनल जातली. हे मॅची वरवीं आयपीएलाक नवो वस्ताद मेळटलो. बंगळुरू आनी पंजाब हांकां अजून मेरेन एकाय ही लीग जिखपाक शक्य जावंक ना.

रॉयल चॅलेंजर्स बंगळुरून णव वर्सांनी फायनलींत सुवात मेळयल्या. तो आपल्या पयल्या किताबाच्या सोदांत आसा. जाल्यार पंजाब 11 वर्सांनी किताबा खातीर खेळटलो. निमाणे खेपे ताणें 2014त फायनलींत सुवात मेळयिल्ली. दोनूय पंगडां मदीं उमळशीक वाडोवपी मॅच जावपाची शक्यताय आसा.

रजत पाटीदाराच्या फुडारपणाखाला खेळपी रॉयल चॅलेंजर्सान अंदूंच्या हंगामांत पंजाब किंग्सान दोन खेपे हारयला. हातूंत क्वॉलिफायर मॅचीचो आस्पाव आसा. त्या वेळार बंगळुरून 8 विकेटींनी सहज जैत जोडिल्लें. बंगळुरूचो स्टार बॅट्समन विराट कोहली सध्या फॉर्मांत आसा. ताणें 15 डावांनी 146.53चे स्ट्रायक रेटीन 614 धांवड्यो केल्यात. आयचे मॅचींत लेगीत पंगडाक ताच्या कडल्यान बऱ्या प्रदर्शनाची आस्त आसतली.

ताचे खेरीत फिलिप सॉल्ट लेगीत फॉर्मांत आसा. फाटले मॅचींत ताणें 27 बॉलांनी 56 धांवड्यो केल्ल्यो. पाटीदारान मदले फळयेंत बरी बॅटींग केल्या. तशेंच मयंक अग्रवाल, कृणाल पांड्या आनी जितेश शर्मा हांणी लेगीत पंगडाक योगदान दिलां. फास्ट बॉलर जोश हेझलवुडाच्या पुनरागमनान बंगळुरूच्या बॉलिंग विभागाक घटसाण फावो जाल्या. अणभवी भुवनेश्वर कुमार आनी स्पिन जोडी सुयश शर्मा आनी यश दयाल हांणी ताका बरी साथ दिल्या.

दुसरे वटेन पंजाब किंग्सान क्वॉलिफायरांत लजेक घालपी हार घेतल्या उपरांत दुसरे क्वॉलिफायरांत जबरदस्त प्रदर्शन करून पांच खेपेचो वस्ताद मुंबय इंडियन्साक पांच विकेटींनी हारयिल्लो. मुखेली श्रेयस अय्यरान 41 बॉलांनी नाबाद 87 धांवड्यो केल्ल्यो. पंजाबाचे सुरवातीचे बॅट्समन लेगीत फॉर्मांत आसात. प्रभसिमरन सिंग (523) आनी प्रियांश आर्या (451) हांणी सातत्यान आपल्या पंगडाक बरी सुरवात करून दिल्या. जोस इंग्लिसान तिसरे सुवातेर येवन धांवड्यांची गती वाडोवपाचें काम केलां. जाल्यार अय्यरान मदले फळयेंत 175चे जबरदस्त स्ट्रायक रेटीन 597 धांवड्यो केल्यात. बॉलींग विभाग मार्को जानसेन, कायल जॅमिसन आनी अर्शदीप सिंग हांणी वेवस्थीत सांबाळ्ळा. लेग स्पिनर युजवेंद्र चहलाच्या पुनरागमनान बॉलिंग विभागाक आनीक घटसाण आयल्या.