भांगरभूंय | प्रतिनिधी
रातीं 1.05 वरांचेर सुरू, 2.24 वरांचेर सोंपतलें
मुंबय, खबरां संस्था ः आयज 28 ऑक्टोबराचे मध्यानरातीं वर्सांतलें निमणें चंद्रग्रहण जातले. हे आंशिक चंद्रग्रहण आयज रातीं 1.05 वरांचेर सुरू जातलें आनी 2.24 वरांचेर सोंपतलें.
चंद्रग्रहणाच्या 9 वरां आदीं म्हळ्यार आयज दनपारां 4.04 वरांचेर सुतक सुरू जाता. देखून देवळांचीं दारां बंद आसतलीं आनी भोवतेक देवळांनी शरद पुनवेचो उत्सव जावचो ना. गिराण सोंपलें उपरांत आयतारा सकाळीं देवळांत शुद्धीकरण करून दारां उक्तीं करतले.
हें गिराण सुमार 1 वर आनी 19 मिनटां चलतलें. सुमार 1.44 वरांचेर चंद्राचो 12.6% भाग धर्तरेचे सांवळेन व्यापिल्लो दिसतलो. हवामान निवळ आसता तेन्ना ही खगोलीय घडणूक पुराय भारतांत पळोवंक मेळटा. भारता वांगडाच आशिया, युरोप, ऑस्ट्रेलिया, आफ्रिका, उत्तर अमेरिकेंतय हें गिराण दिसतलें. हाचे उपरांत भारतांत दिसपी फुडलें चंद्रग्रहण 2024 वर्सा 17-18 सप्टेंबराचे रातीं जातलें.
आंशिक चंद्रग्रहण
जेन्ना धर्तरी सुर्या आनी चंद्र हांचे मदीं पुरायपणान येना आनी धर्तरेची सावळी फकत चंद्राच्या कांय भागाचेर पडटा तेन्ना ताका आंशिक चंद्रग्रहण अशें म्हण्टात. ह्या वेळार धर्तरेची सावळी चंद्राच्या फकत 12.6% भागाचेर पडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
