भांगरभूंय | प्रतिनिधी
मतदान कोणाक करपाचें तें दरेकल्यान स्वता थारावपाक जाय. कोण तरी सांगता म्हूण…
जिल्हो पंचायतीं (झेडपी) खातीर आयज मतदान जाता. 8 लाख 69 हजार 356 मतदार उमेदवारांचो फुडार आयज थारायतले. सरकारी नोकरेचे पांच जागे आसल्यार मुलाखती खातीर 500 उमेदवार येतात. हांगाय 50 जाग्यां खातीर 226 उमेदवार आसात. तातूंत सध्याचे फक्त णव. तर फाटले 12 उमेदवार परतून वेंचणूक रिंगणांत देंवल्यात. बऱ्याच उमेदवारांची अडचण जाल्या, कारण चडशे मतदारसंघ बायलां खातीर आनी हेर मागासवर्गियां खातीर राखीव आसात. फुडाराक हो आरक्षणाचो आंकडो वाडुये. हरशी पंचायत, पालिका, जिल्हो पंचायत वेंचणुकेंत राजकी पक्षांनी देंवपाकूच जाय, अशें नासता. तरी हालींच्या वर्सांनी सगलेच पक्ष प्रत्येक वेंचणुकेत वेंचणुको लडयतात. शिक्षण संस्था, बँको, पतसंस्थांच्या वेंचणुकांनीय राजकी पक्षांचो ‘अंदर- बाहर’ खेळ चालू आसता. हे वेंचणुकेचो प्रचार केन्ना न्हय तितलो नेटान जालो. जणू काय विधानसभा वेंचणूकच! भाजपाचे 40 जाल्यार काँग्रेसीचे 37 उमेदवार आसात. विरोधी पक्षांची युती जावंक नाशिल्ल्यान निकाल एकतर्फी वा धपको दिवपी आसतलो, अशें कांय जाणकारांक दिसता. कितें तें ह्या सोमारा कळटलें.
भाजपान फाटले खेपे पन्नासांतले 33 जागे जिखिल्ले, तर मगोन 3. हे खेपे तांची युती आसा. म्हणटकच यशाची चड संद. काँग्रेसीक फक्त चार जागे मेळिल्ले. आप, एनसीपीक दरेकी 1 आनी सात अपक्ष. हे फावटूय विरोधक स्वतंत्रपणान लडटात. आरजीय आसा. म्हणटकच भाजप युती जिखता काय विरोधक अजाप करपी निकाल लायतात, ताचे कडेन लोकांचें लक्ष आसतलें. वेंचणुकेंत रोजगार, म्हारगाय, उदरगत मतींत घेवन मतदान जाता. धर्म, जात, अर्थीक वेव्हार, आस्वासनांचोय मतदार विचार करतात, हें कोडू आसलें तरी सत्य. उत्तरेंत 2 लाख 13 हजार 704 दादल्यांचे तुळेन 2 लाख 26 हजार 382 बायलो आसात. तर दक्षीणेंत 2 लाख 6 हजार 902 दादल्यांचेर तुळेन 2 लाख 22 हजार 253 बायलो आसात. म्हणटकच कोणाक जिखोवपाचें तें बायलो थारायतल्यो. ‘जिच्या हाती पाळण्याची दोरी, ती जगाते उद्धारी’ अशी म्हण आसा. म्हणल्यार भुरग्यांक जी सांबाळटा, ती जगाचो उद्धार करता. कारण ती शंबर गुरुं परस श्रेश्ठ आसता. मतदान करतना आवय, भयणींनी हाचो विचार करचो.
मतदान कोणाक करपाचें तें दरेकल्यान स्वता थारावंक जाय. कोण तरी सांगता म्हूण कुड्डेपणान मत मारपाक जायना. एकान एक मतदारान आयज सांज मेरेन भायर सरपाक जाय. काल, आयज, फाल्यां सुटी, म्हणटकच थोडे देवाक बी गेल्यात आसतले. मतदान वळेरी घेवन बशिल्ल्यांक हें कळटलेंच. मतदान हें पवित्र कर्तव्य. कारण तें आमचो, समाजाचो, वाठाराचो, देशाचो फुडार थारायता. ते खातीर प्रत्येकान मतदान करपाक जाय, तेंय बी विचार करून. तें 90 टक्क्यां वयर जावंदी.
राज्याची उदरगत करप्यांक मतदान करचें अशें सरकार पक्षांचे समर्थक म्हणटात. तर जमनी, दोंगर भायल्यांचे भकीक पडल्यात. गुन्यांव, दुर्घटणा वाडल्यात देखून सरकार पक्षांक मतदान करचें न्हय, अशें विरोधकांचें मत. भाजपान म्हजें घर येवजणीचो मुद्दो प्रचारा मजगतीं वापरलो, तर विरोधकांनी दुर्घटणा, गुन्यांव, जमीन विक्रेचो. राष्ट्रीय मुद्द्यांक कोणें चड म्हत्व दिलें ना. प्रत्येक मतदाराक म्हत्वाचे मुद्दे खबर आसपाक जाय, सुवार्था बदला स्वताचें प्रामाणीक मत, विचार आसचे. ते खातीर ऐकीव गजालीं बदला दिसाळीं, खबरां चॅनल, सोशल मिडिया सदांच नदरे पोंदच्यान घालपाक जाय. खबरांचो अभ्यास जाय, विचारसरणी कुशीक दवरून तांचेर चर्चा करूंक जाय. हें जाताच अशें ना.
जिल्हो पंचायतींक आनीक अधिकार, कामां दिल्यार पंचायती, सरकारी खात्यां वयलें वजें थोडें उणें जातलें. जायत काय हाका पंचायती, खातीं तयार?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
